EDITORYAL - Anti-Drunk and Drugged Driving Act

Magsugod na ang implimentasyon karong buwan sa Hunyo sa Anti-Drunk and Drugged Driving Act karong gipagawas na ang tamdanan kon Implementing Rules and Regulations(IRR) sa Department of Transportation and Communications (DOTC).

Maayo kini og tumong tungod kay alang kini sa kaluwasan sa mga road users. Dunay nagtangag nga bug-at nga silot ug multa nga moabot og 20 ka tuig nga pagkabilanggo ug tunga sa milyon ka pesos nga maximum nga multa alang niadtong malapason.

Di man unta kini mapasar nga balaura kung wala pay mga aksidente nga ang hinungdan tungod sa mga iresponsable nga mga drayber nga bisan og nakainom o hubog magpaturagas gihapon pagpadagan sa ilang mga sakyanan, bahala na lang og makadasmag sa uban.

Apan bisan pa man sa kamaayo sa tumong niini, daghan ang nabalaka sa pagpatuman na unya niini tungod kay dako kaayo ang tsansa nga abusohon kini sa uban.

Gani bisan ang kanhi direktor  sa Cebu City Police Office nga si Senior Superintendent Mariano Natuel Jr. miingon nga humok kaayo kining abusohon.

Mahimo man gud nga atangan na lang diha sa gawas sa mga bars ug balay kahilayan ang mga tawong gidumtan  ug paabuton nga momaneho sila sa ilang mga sakyanan aron sila ipadakop.

Nag-una unyang maapektahan niini ang mga bar owners ug tagdumala sa mga hotels kay ang ilang mga parokyanong adunahan nga magkanunayan panahon sa gabii di na man unya manuroy sa ilang mga establisamento.

Way balaod nga di maayo, apan daghan sa mga balaod ang nagamit sa pipila ka tawo’ng mobawog niini pabor sa ilang mga interes. Ang nakaparat niini kung ang matungnan kadto intawong way ikasarang ug giinitan lang sa uban.