Langitnong gawi ni anhing Boboy

Sa sinugdanan, mga karmelitos lang ang tinda ni anhing Boboy. Apan pagpanglabay sa mga adlaw nagkaanam kini’g tubo hangtod nahimong dako na nga tindahan sa Mountain Barangay Adlawaon. Giaway siya sa mga karibal nga manindahay usab sa ilang dapit. Gikuwestiyon siya nganong baratohon ni Boboy ang presyo sa iyang mga baligya? Miminus lang nuon ang ilang kustomer.

Ania ang simpleng tubag ni Boboy: “Dili man ni negosyo ang akoa. Pagpangalagad man ni sa akong isig ka tawo.” Pagkanindot nga panag-ingnan! Pagkabalaanon nga buhat!

Usahay, makit-an si Boboy sa iyang mga kauban sa trabaho nga magdala’g basiyong duha ka plastic containers nga iyang ihigot sa masig ka kilid sa motorsiklo niya. Diay, inig dayong pauli niya ngadto sa bukid mohapit siya sa gasoline station aron patimbolan ang maong duha ka container. Iya gyud kining pun-on. Inig abot niya sa ilaha, iya ning ibaligya sa iyang mga silingan nga wala’y tubo ang presyo. Kun pila man ang kantidad sa matag litro sa gasoline didto sa gipalitan niyang gasoline station, mao ra sab ang presyo nga iyang ihatag ngadto sa iyang katagi-balangay.

Nganong di niya patuboan? Ania ang iyang rason: “Tungod kay gusto man kong makatabang sa atong isig ka ingon, nga kutob sa unsay abot o produkto dinhi sa bukid, mahatod sa labing daling panahon ngadto sa patag ug mapahimuslan sa atong kaigsuonan.” Pagkadalaygon nga pagpakabana! Pagkabulawanon nga taras!

Mga langitnong gawi ni Boboy nga angay’ng isangyaw. Ayawat na lang nga kapanaminan kini sa katawhan, kinsa ning atong panahon wa nay gugma sa kaigsuonan ta.