Duha na lang ka tuig ang paabuton mapupos na ang termino ni Pres. Noynoy Aquino.
Tungod sa nagkaduol nga eleksiyon sa 2016, ang mga dagkong politiko nga gustong mag-aktibo sa politikanhong kalihukan sa nasud puhon duha ka tuig paabuton, mag-“positioning†na.
Unsa man ning positioning? Mao kini ang pagbutang sa mga tawo sa politikong gustong modagan pagka-presidente sa moabot nga presidential election.
Una natong nadiskitaan si kanhi Senador Panfilo Lacson sa dihang kalit siyang gitudlo ni Noynoy nga rehabilitation czar.
Apan ang positioning sa laing grupo nga alyado gihapon ni Noynoy nakit-an sa dihang si Lacson mireklamo nga adunay duha ka ahensiya sa kagamhanan nga wala mokooperar sa iyang buhatan pagpatuman sa rehabilitasyon sa mga lugar nga naigo sa bagyong Yolanda.
Nakahinumdom kamo nga sa wala pa itudlo si Lacson isip rehab czar, nabaniog ang korapsiyon sa Department of Public Works and Highways pagpabarog sa mga bunkhouse alang sa mga biktima sa bagyo.
Samtang wala’y kaso nga gipasaka batok kang DPWH Sec. Rogelio Singson, aduna gihapoy mga proyekto nga may kalambigitan ang pagpabarog sa mga probinsiya sa eastern Visayas human maigo sa bagyong Yolanda.
Sa ato pa, bisan si Lacson ang hawod sa paninguha pagpabarog sa mga lugar nga naigo sa bagyo, si Noynoy milingi gihapon sa ubang sakop sa kabinete, bisan ang ilang partisipasyon makadaot sa kinatibuk-ang plano sa rehabilitasyon nga gitahas kang Lacson.
Dili hinuon malikayan nga mangunay si DILG Sec. Mar Roxas nga maka-apil-apil sa paninguha pagpabarog sa Tacloban ug sa ubang probinsiya sa Leyte tungod kay ubos man sa iyang superbisyon ang mga lokal nga kagamhanan.
Apan ang gikalipay nako og dako mao ang positioning sa grupo ni kanhi Sen. Kiko Pangilinan, kinsa maoy giatbang kang Agriculture Sec. Proceso Alcala pinaagi sa pag-appoint niya isip presidential adviser on food security.
Dakong sagpa kang Alcala ang appointment ni Pangilinan tungod kay giklaro gyud sa appointment sa naulahi nga ang dakong tahas niya mao ang “paglimpyo†sa mga ahensiya nga nalambigit sa agrikultura ug pagkaon.
Suhito si Pangilinan sa mga binuang sa Department of Agriculture ug sa mga attached agencies niini sama sa National Food Authority (NFA), National Irrigation Administration (NIA), ug Philippine Fertilizer Corp.
Sa pagkatuldo ni Pangilinan, giklaro dayon ang upat ka ahensiya nga ipaubos sa iyang superbisyon.
Si Alcala ang labing luod sa mga kalihim. Sa paglingkod pa lang niya, wala’y hunong ang rice smuggling ug gipasulod pa gyud niya ang “frozen meat†smuggling, nga sa dihang nangreklamo ang lokal nga industriya sa baboy (namuhi ug mga negosyante og baboy), siya pa hinuon ang nangabogar nga mapakubsan sa Bureau of Customs ang taripa sa mga frozen meat aron dali na lang kining makasulod sa Pilipinas ug mokompetensiya sa mga lokal nga baboy.
Maayo gani kay taas ang kooperasyon sa mga kunsomedor mismo. Ang mga konsumedor mangita gyud og presko ug bag-ong ihaw nga ibitay sa mga lamesa sa merkado aron maoy paliton kay sa mga frozen meat nga wala kita masayod diin nga baboyan sa China naggikan, giunsa pagpadako, unsa nga mga tambal ang gi-injection, giunsa pag-ihaw, kanus-a giihaw, pila ka bulan gibiyahe sa kadagatan sa kalibutan, ug pila ka milyon ang bacteria sa karne nga i-display sa merkado nga gihaw-as sa freezer.
Si Alcala mao usab ang kalihim sa agrikultura nga gikiha sa usa ka abogado tungod sa overpricing sa imported nga humay gikan sa Vietnam, mao nga hangtod karon nag-atubang kini og kasong plunder.
Gawas nilang Singson ug Alcala, ang positioning nahitabo usab sa Philippine Charity Sweepstakes Office (PCSO) diin si chairperson Margie Juico ilisan ni Kongresista Ereneo Maliksi.
Ayaw na lang kamo paabot nga adunay positioning sa Department of Budget ang Management aron mawagtang si Sec. Butch Abad, kay si Abad dili mahimong iluwa ni Aquino tungod sa utang kabubut-on kay si Abad ang campaign manager sa iyang presidential campaign niadtong 2010.
Sa nahibulong nganong aduna kining gitawag og positioning, makasabot kamo pinaagi sa pagtan-aw sa dynamics kun unsay lihok sa matag eleksiyon.
Siyempre, matag presidential election, nagkinahanglan ang matag kampo og campaign fund aron i-bankroll sa kampanya.
Busa, kita ra nga mga magbubuhis ang gigisal sa kaugalingon natong mantika kay ang atong mga buhis ang iwariwari matag eleksiyon. Mga proyektong pundohan sa atong buhis grabe og overpricing kay ang kikik niini adto man mapunta sa bagman nga mopadagan sa kampanya sa umaabot, wala pay labot ang smuggling ning panahona nga tinago-tago nga gihimo sa mga alyado sa administrasyon.
Kining positioning karon sa mga dagkong politiko, sa gusto nato o dili, kitang mga Pilipino ang alkanse niini.
Apan wala kita’y mahimo tungod kay mao na gyud kini ang mahitabo sa matag unom ka tuig nga presidential election ug sa matag tulo ka tuig nga midterm election.
Ang mahimo nato mao ra gyud ang pagpanghupaw dala ang pag-ampo nga magabaan ra ang mga kanahang dagko.