Wa nay tagoanan si Erecre
Haskang kuganga nako pagkahibawo sa pagkasikop ni Roy Erecre, ang gipasanginlang pangu sa mga rebeldeng komunista sa Central Visayas, sa Davao City niadtong Miyerkules sa buntag. Kay usa siya sa among nahisgutan uban sa kadagkoan sa militar nga nikuyog sa pag-inugurar sa duha ka classroom nga school building nga gitukod sa ABS-CBN Foundation ug kasundalohan sa Linantuyan, Guihulngan City sa Negros Oriental niadtong Martes.
Mao diay’ng salabtunon ang tubag sa mga opisyal sa Central Command dihang among gipangutana hain na si Erecre. Kay human siya naapiki sa Bohol gikatahong nibalhin sa Negros Oriental sa wa pa modangop sa laing dapit. Nagpakahilom lang diay nga natultolan na si Erecre sa Mindanao.
* * *
Wa hinuon matago sa militar ang dako nilang kalipay sa pagkasikop ni Erecre, nga may patong diay’ng P5.4 milyones alang ni bisan kinsa nga makahatag og kasayuran nga mosangpot sa iyang pagkasikop:
• Abundang detalye sa usa ka semanang pagpaniid sa giingong island hopping ni Erecre sa Davao;
• Way pupanaganang gibutyag nga may babayeng kuyog si Erecre, gawas nga giila nga si Judith Jaron-Niog gihulagway pa gyong minyo og laing laki; ug
• Nangintriga pa nga angay’ng ipasabot ni Erecre sa Communist of the Philippines (CPP) nganong naglulinghayaw atubangan sa dakong haw-ang sa liderato human nasikop silang Benito ug Wilma Tiamzon sa Sugbo.
* * *
Laing nakapakugang nako mao ang kadaghan sa mga hulagway sa pagkasikop ni Erecre. Di kuha sa mga sakop sa media. Kun dili gimantala sa Armadong Kusog sa ilang website. Di hinuon ni unang higayon nga nabantang sa publiko ang dagway ni Erecre. Hagbay rang gipakatap sa militar ug kapolisan ang mas batan-on ug bigotilyo niyang hulagway uban ang saad sa mas dakong premyo nga P5.6 milyones.
Di mi suod ni Erecre. Wa ko masuhito sa iyang pagkatawo. Ni sa iyang kalihokan sa giingong pagpangu sa rebelyon sa Kabisay-an. Apan nagkatapad ang duha ka duyan nga among gikatulgan.
* * *
Gidapit kong Erecre sa ilang kampo sa Bohol pila ka tuig nang nilabay. Gilibutlibot ko sa iyang kaubanan sa Chocolate Hills una paatubanga niya. Gihatagan ko niya sa tanang higayon nga makapangutana hangtod nahurot ang akong bawong cassette tape (gidid-an kong magda og cameraman ni camera).
Masaligon si Erecre nga di siya madakpan bisan unsaon paggukod sa militar samtang may Chocolate Hills pang katagoan. Apan pagkahuman sa circumferential road sa Bohol atol sa pamunoan ni anhing gobernador Erico Aumentado, nitabok siya sa Negros. Wa magdugay gikatahong nibalhin na sab. Nakaamgo na ba si Erecre nga sayop ang iyang pagsalig sa kabukiran? Nga mas epektibong tagoanan ang katawhan nga nagpaluyo sa iyang kawsa? Apan magmatinud-anon lang sila niya kun makumbinser nga tinuod siyang nakigbisog alang sa makiangayong kausaban.
- Latest
