Lapdos sa ting-init

Hilabihan na gayud sa kainit karon. Sulod na sa pipila ka semana nga grabe ka alimuot bisan pa man panahon sa kagabhion. Mao nang siguro hilabihan usab ka dako sa balayranan sa atong kuryente gumikan niini.

Apan mora’g molungtad pa ang kainit nga atong nasinati. Kini gumikan kay adunay nagpahipi nga El Niño. Matud pa sa PAGASA nga ang kainit karon padayon pa hangtud sa panahon sa ting-ulan.

Gani gitagna sa weather bureau nga hangtod pa tunga-tunga sunod tuig ang paglapdos sa El Niño. Apan ang maayong balita mao nga mas gamay lamang kuno ang bagyo nga mohapak sa nasud tungod niining maong hulaw.

Mao nang kugi karon sa pagpahimangno ang otoridad sa publiko nga magmatngon batok sa grabeng kainit. Tambag sa Department of Health nga kinahanglan kanunay nga magpabugnaw kita aron malikayan ang heat stroke. 

Daghan nang na-hospital ug namatay tungod sa heat stroke. Ug kinahanglan nga ato kining likayan pinaagi sa pag-inom og daghang tubig ug pagpalayo gikan sa naglagitim nga kainit sa gawas.

Hinuon dili lamang mga seryosong sakit sa kalawasan ang dala niining kainit karon. Sama sa naandan matag tuig dinhi sa Pilipinas, dako usab kini’g epekto sa atong suplay sa tubig ug kuryente.  

Didto sa Mindanao, mas misamot pa ang problema sa kakulangan sa kuryente. Kini gumikan kay minos na ang suplay sa tubig nga maoy nagpadagan sa mga turbines nga maoy tinubdan sa ilang kuryente didto.

Apan dinhi sa dakbayan sa Sugbo, dili brownout ang nag-unang problema karon kondili ang grabeng kakulang sa tubig. Kini ilabina didto sa mga elevated nga lugar sama sa among gipuy-an sa Ponce Compound sa Capitol Site.

Gani matag adlaw sulod na sa pipila ka semana, hubas gayud ang among mga gripo sa MCWD. Moagas lamang og hinay apan adto na sa kaadlawon. Mao nang dili sad mi makatulog og tarong tungod kay magpaabot pa man kanus-a moagas ang tubig.

Pwerte gayud kapait sa kahimtang sa mga lumulupyo dinhi sa among lugar ning panahon sa ting-init. Hagbay ra kining maong problema apan hangtud karon wala gyud kasulbad ang MCWD.