Hambugero ra kaayo sila

Kaming mga peryodista adunay tagsatagsa ka opinyon sa matag higayon nga makabasa kami og balita. Usahay wala lang, samtang may mga higayon nga mahimuot ug makakatawa kami sa among mabasa o madunggan nga balita, ug adunay daghang higayon nga maglagot kami sa tinubdan sa balita tungod kay tira-pasagad lang.

Niadtong miaging adlaw, nakabasa ko og balita nga makapahimuot kanako kay ang labing dako nga politiko sa unang distrito sa Sugbo nga gipildi lang og tawong makapila pildeha sa eleksiyon sa Talisay, mitingog  na gyud tungod sa iyang nakita nga salikwaot nga pamalakad sa kagamhanan sa Talisay.

Apan pagkasunod adlaw, ang akong kahimuot sa tinubagay nilang Kongresista Eduardo Gullas ug Mayor Johnny delos Reyes napulihan og kalagot nga nagbasa sa balita sa reaksiyon sa anak sa mayor sa Talisay nga mao usab ang city administrator sa maong siyudad sa sulat ni Bise Mayor Romeo Villarante ngadto sa mayor nga nangayo og subay ug kaangayan sa paglaslas sa job order (JO) nga mga trabahante sa iyang buhatan ug sa mga konsehal.

Naglagot ko sa sobrang hambog ni John Yre delos Reyes.

Igo ra nga mi-communicate si Villarante sa mayor kabahin sa problema sa JO. Isip city administrator, tan-awon unta niya ang “propriety” sa iyang pag-apil-apil sa komunikasyon  tali sa mayor ug sa bise mayor.

Dili lang kay kana ra, hambugero ra kaayo siya sa iyang pag-lecture kang Villarante nga wala siya’y gahum nga mokuwestiyon sa desisyon sa mayor paglaslas sa JO sa konseho tungod kay bise mayor lamang siya nga ang trabaho mao ang pagpanday og balaod.

Ang gi-lecturan ni John Yre si Villarante nga usa ka abogado.  Kun ingon niini ka-hambugero si John Yre, mao usab ang kalihay ang iyang amahan sa mga isyu nga gipatubag ni Ediegul, sama sa buslot nga panudlanan sa Talisay taliwala sa kuwestiyonable nga aplikasyon sa loan, paglawgaw sa administrasyon sa Talisay City College ug ang paghimo niya sa Talisay City Hall nga “family business” tungod kay iyang gipatrabaho ang iyang anak isip city administrator ug mga paryente sa uban nga mga posisyon. Ang tubag ni Mayor JVR nga mas makasalig siya sa iyang mga sakop sa pamilya nagpasabot lamang nga wala siya’y salig sa mga Talisaynon.

Makasabot hinuon ko nganong naingon niini si Mayor JVR: dugay na kaayo siyang nagdamgo nga mahimong politiko, apan tungod sa dili katuohan niyang kadaogan, nakalitan siya sa gahum nga hangtod karon maoy nakasap-ong sa iyang mga mata pagtan-aw nga ning higayona siya ug ang iyang anak puwerte na diay’ng hambugeroha.

Kun nagtuo si Mayor JVR ug si John Yre nga sa ilang gibuhat pag-isolate ni Villarante ug mga konsehal nga mga kauban unta nila sa Liberal party niadtong 2010 nga eleksiyon makapadako sa ilang tsansa sa 2016, karon pa lang makaingon ko nga “hambugero ra kaayo sila.”