Reklamo ... protesta

“Reklamo diri reklamo didto. Napuno nala’g reklamo ang kalibutan ron.” Kini suma sa usa ka maestra nga nag sud-ong sa tv coverage sa rali sa mga aktibistang anti-US.

* * *

Tinood. Ug nagkadaiya lang ang mga paagi sa reklamo kon protesta. Didto sa Brazil pananglitan ang mga lalaki naghubo sa ilang sapot taliwa sa karsada tungod sa dili maayong pagduma sa trapiko. Kapin sa 300 ka mga lalaking way sapot ang nagbandoy-bandoy sa karsada.

* * *

Didto sa Maras, India, gibalita nga mga 100 ka mga babaye ang miprotesta kalabot sa kamahal sa pagkaon. No, wala sila maghubo sama sa mga lalaki sa Brazil. Nagpaupaw lang sa ilang buhok.

* * *

Mga 50 ka mga tinun-an sa high school didto sa Pakistan nanghigda, suma sa balita, sa karsada human balibari ang ilang gipangayong respeto sa ilang tawhanong katungod sa mga traffic cops.

* * *

Dinhi sa ato -- sa Manila -- mga anti-US nga mga aktibista ang mipahungaw sa ilang kalagot sa Amerika pinaagi sa pagsunog sa American flag ug sa effigy ni US President Obama ug Pinoy President Aquino.

* * *

Lain nilang gihimo sa pagpakita sa ilang kalagot sa Amerika mao ang pag-splash og hugaw sa marker sa American Embassy sa Manila.

* * *

SA LAING BAHIN ... Daghang salamat sa way hunong nga suporta sa mga magbabasa sa Banat News. Wala sab mi hunong sa pagbawos sa maong pabor pinaagi sa paghatag og maayong mantalaan.