Mabuhi ang mga anak sa singot. Apan mabuhi gyod kaha sila? Lain lain karon ang mga gipasiugdahan nga kalihokan sa nagkalain-lain usab nga grupo sa mga anak sa singot agi og pagduyog sa ilang adlaw.
Ang mga anak sa singot dili gayod angayan nga baliwalaon sa gobiyerno tungod kay sa katambayayong sila sa paglambo sa nasud ug sa iyang katawhan. Tungod kanila ang kinabuhi sa mga magpapatigayon miasenso apan subo nga palandungon nga ang naghago pagmaayo aron moasenso ang kinabuhi sa mga dato nagpabilin sa ilang tumang kalisod. Kun unsa sila kaniadto mao ra gihapon sila karon. Kini tungod kay wala ihatag kanila ang mga angayan nilang dawaton gikan sa ilang mga amo.
Daghan usab sa mga anak sa singot ang nawagtangan og trabaho tungod sa ilang pagreklamo ug pagpangayo sa mga gisita sa balaud nga angayang ihatag ngadto kanila. Subo. Sila na ang dihado sila pa gayod ang gitangtangan og trabaho.
* * *
Mipauli na si Presidente Barack Obama didto sa Amerika human sa duha niya ka adlaw nga pagbisista dinhi sa Pilipinas. Sa iyang pagbiya iyang gibilin ang pasalig nga dili biyaan sa Amerika ang ilang kaalyadong Pilipinas pero wala siya moklaro kun iya ba kitang tabangan kun ugaling gubaton ta sa China. Sa iyang pagbiya gipabawon usab sa Pilipinas ngadto sa Amerika ang bag-o lang gipirmahan nga Enhance Defense Cooperation agreement diin gihatagan sa Pilipinas ang Amerika nga makapuyo sa nasud sulod sa napulo ka tuig nga walay bayad-bayad og buhis.
Ang uban miingon nga alkanse ang Pilipinas sa maong kasabotan apan wala kitay mahimo tungod kay mao kini ang labing maayo nga himuon sa nasud aron makaseguro ta nga tabangan ta sa mga Amerikano.
* * *
Nagprotesta ang mga walhong grupo sa pagbisita ni Presidente Barack Obama sa Amerika dinhi sa nasud sulod sa duha ka adlaw. Ato ra silang masabot tungod kay kanunay na kini nilang gihimo ngadto sa mga Amerikano. Kun nagprotesta ug nag-rally ang mga walhon sa pag-abot sa mga barko ug eroplanong iggugubat dinhi sa nasud samot na gyod nga sila magprotesta kay ang presidente na man gayod sa nasud nga ilang gikalagotan ang mibisita. Maong mosabot na lang ta nila.