Ang krus ug ang kalayo

Dunay higala nako nga miduol kay lagi iyang ipahubad ang iyang damgo. Siya kuno gilansang sa krus sa mga sakop sa iyang pamilya diin usa kanila, human siya malansang ang midul-it og sulo sa iyang nawong. Samtang ang iyang mga ginikanan ang nagtan-aw lamang sa halayo. Nagpasabot ba kini nga siya sakiton nga unta maayo man siyang tawo? Sa dili pa nato siya hatagan sa kahulogan ato unang tan-awon ang mga simbolo ug mga hulagway nga anaa sa iyang damgo.

Krus- dili lang nato sabton kini ingon nga kasakit ug pag-antos. Nagkahulogan usab kini og responsibilidad.

Kalayo- simbolo sa kahingpitan, mahimong simbolo sa mainitong gugma o kinabuhi. Mahimo pud nga simbolo sa kalaglagan kun kini dako na kaayo.

Ang mga Ginikanan sa Halayo- Mahimong sabton nato kini nga aktwal nga kahimtang o simbolismo sa usa ka adult figure nga passive kaayo sa pagtuman sa ilang responsibilidad nga napasa na hinuon ngadto sa gilansang sa responsibilidad.

Ang maong kahimtang sa akong higala ang nagpasabot nga siya mismo ang wala na mahimuot ni malipay sa iyang kahimtang. Ang kalayo nagdapit kaniya sa pag-purify sa iyang intensiyon sa pagtabang sa mga sakop sa pamilya. Nakahaling ang maong kasinatian og kasagmuyo ngadto sa mga ginikanan niya nga inadequate kaayo sa pagtuman unta sa responsibilidad nga alang unta kanila. Ang maong damgo signal warning sa gitawag natong burn out.