Dili usa ka ordinaryo nga isyu kun adunay mga sakyanan nga gi-impound sa kapolisan apan gamit-gamiton ra diay sa pipila ka abusado nga opisyal alang sa personal nila nga katuyoan, ilabi na kun gamiton kini paghimo’g krimen.
Daghang mga polis nga gitaktak sa serbisyo human ang Office of the Ombudsman nakakaplag kanila nga sad-an sa paggamit-gamit sa mga sakyanan nga ilang gi-impound kay nakahimo og kalapasan sa balaod ang mga tag-iya.
Dili tuod mahibaw-an dayon tungod kay ilisan man nila ang plaka sa mao nga sakyanan kun ipagawas na gikan sa impounding area. Ingon gayud niini ang sagad gihimo sa mga abusado nga kapolisan. Ang angay’ng himoon mao ang pag-imbentaryo sa tanang nasakmit nga sakyanan.
Apan unsa’y kasiguroan nga i-report gayud sa mga abusado nga opisyal ang tanang gisakmit nila nga sakyanan. Kaniadto, adunay usa ka yellow nga sports car nga gipanag-iya sa usa ka Eddie Ybanez. Gi-impound kini diha sa Camp Sotero Cabahug kay kuwang og ebidensya.
Paglabay sa katuigan, ang bag-o nga mga ligid atol sa pagkasakmit sa sports car, daw nahilis ug nakita na ang mga ply. Ang sinaw kaayo nga mga yantas nahimo na nga ordinaryo ug tayaon.
Nahimo’ng kataw-anan kay ang sports car ni Ybanez diha’ng gibuksan, wala na ang makina, ang radiator tank, ang battery, ug uban pa nga kagamitan, wala na. Mahilis diay ang ligid ug mahanaw ang makina kun dili na gamiton ang sakyanan?
May ordinaryo kaha nga kawatan nga mosulod sa kampo sa kapolisan?