Bangsamoro Cebu, binuang!

Gawas kang Senador Miriam Defensor-Santiago, wala nay isog nga mikuwestiyon sa konstitusyonalidad sa Bangsamoro Framework Agreement.

Karon nga napirmahan na ang agreement tali sa Moro Islamic Liberation Front (MILF) ug sa Government of the Philippines (GPH), makaangkon na og kaugalingon nga gobyerno ug teritoryo ang kaigsuonan natong mga Muslim.

Dili malikayan nga bisan sa kaayuhan nga mahimo niining framework, adunay mga kampo nga nakakita og dili maayong tilimad-on nunot sa pagtuo nga adunay tipik sa atong kaugalingnan nga itahan ngadto sa MILF, ug mao kini ang hinungdan nga si Senador Santiago miisip niining framework agreement nga 'unconstitutional.'

Bisan ako naguol ug nahadlok nga mahitabo ang gikahadlokan sa uban nga mahimulag ang Mindanao sa umaabot nga katuigan ug kining framework agreement maoy tikang paingon niini. Apan unsaon ta man nga lahi man ang panglantaw sa gobyerno ubos ni Pres. Noynoy Aquino kay sa panglantaw sa pipila ug maoy nakit-an kining maong framework nga kasulbaran sa dugay nang gihambin nga problema sa Mindanao.

Pero karong bag-o, adunay mitumaw nga mga sugyot nga makalibog kun seryoso ba, angay ba kataw-an, angay ba suportahan, o angay ba nga bugalbugalan. Ang sugyot nga kita usab dinhi sa Sugbo mohimo usab og Bangsamoro Cebu.

Dili man kita mga Muslim. Busa dili angayan alang kanato ang Bangsamoro Cebu.

Apan akong ibubo ang suporta sa giduso nga "self-governance" sa Cebu. Sa atong resources, igo na kaayo nga mabuhi ang atong probinsiya. Gani, dakong tipik sa atong buhis tua man mapunta sa kauluhan nga atong gihinganlan og "imperial Manila." Daghan sa mga inprastraktura didto nga gigastohan sa atong buhis ug adunay mga serbisyo nga kita mismong mga Sugboanon nagtabang sa pag-subsidize, sama sa pletehan sa LRT ug MRT.

Apan kanang giduso nga Bangsamoro Cebu, binuang na.

* * *

Human sa signature campaign sa Simbahan sa Putli nga Kasingkasing ni Maria sa Minglanilla aron iduso nga wala nay disko sa gabii sa dili pa ang Sugat Kabanhawan ug pagduso nga ang Sugat anha na himuon atubangan sa Simbahan, desidido na si Mayor Lani Peña nga adto gyud sa Minglanilla Sports Complex himuon ang tinuig nga kalihukan sa Domingo sa Pagkabanhaw.

Ang akong gikahadlokan mao nga kun dili gyud magkasinabot ang simbahan ug lokal nga kagamhanan sa Minglanilla.

Kay midesider na man ang mayor nga adto sa sports complex ang Sugat (apan wala nay disko) kay nakapangandam na sila niini ug nakapagawas na og P2 milyones nga pundo ang lungsod, gikuyawan ko nga modesider silang Fr. Arnie Visitacion nga maghimo usab og linain nga Sugat ang Simbahan.

Apan sa pagsulat ning Tikdol, atong nahibaw-an nga nagkasinabot na silang Mayor Peña ug Fr. Arnie nga adto lang una sa sports complex ang Sugat ning tuiga ug ang venue niini sa sunod tuig, sabotan pa.

Ang disko nasabutan na gyud nga wad-on.

Maayo kini.