Hagit sa simbahan

Nagmaya ang mga tawo nga nisuporta ug nagpaluyo sa Reproductive Health Law human gisuportahan ug gideklarar nga constitutional ang halos mayoriya sa maong balaud. Apan adunay mga probisyon nga gibasura sa labing taas nga hukmanan. Lakip sa gideklarar nga unconstitutional ang pagpugos ni bisan kinsa sa pagdawat ug pagsunod sa reproductive health. Di’ mapugos ang mga minor de edad nga mopaubos sa mga lakang kabahin sa maong balaud. Di’ mahimong magdesisyon ang usa ka asawa kabahin sa iyang pagka-inahan nga wa’y pagtugot sa iyang kapikas. Di’ mahimong mapugos si bisan kinsa nga mosunod sa unsay gilatid sa balaud tungod kay mas gipatigbabaw karon sa Korte Suprema ang konsensya sa usa ka tawo ug ang iyang kagawasan sa pagpili sa unsay tukma alang niya.

Nipagawas ang Korte Suprema sa labing patas nga desisyon alang sa labing kontrobersyal nga balaud nga napasar sa nasud nga mayoriya sa mga tawo mga Katoliko. Apan sa desisyon nga gipakanaog, dalaygon ang Catholic Bishops Conference of the Philippines sa iyang nahimong reaksyon nga pagsuporta sa maong balaud inay supakon ang tanan. Makapadayeg ang gihimo sa kadagkuan sa simbahan apan nagbilin ni og labing bug-at nga hagit o tahas. Unsaon sa pagsiguro nga mamintinar ang katakos, integridad ug labaw sa tanan, ang dogma sa simbahan luyo sa pagpasar sa ingon ining matang sa balaud.

Husto si Pope Francis sa iyang mensahe nga mas maayo pang makakita siya og simbahan nga nagkagidlay inay simbahan nga limpyo tungod kay nagpasabot ning adunay katakos ang simbahan sa pagtagad ug paghaw-as sa mga tawo nga nagkinahanglan og igong pagtagad aron maluwas ang ilang moralidad base sa doktrina sa simbahan. Kun basehan ang maong pamahayag sa santo papa, maisip nga RH law ang labing dakong tahas sa Katolikong simbahan sa Pilipinas unsaon nga mopatigbabaw ang pagtuo sa mga tawo inay ang gituhoang makaayo sa gobyerno. Sa maong paagi, mas masukod ang katakos sa mga pari, mga madre ug mga layko sa pagpatigbabaw sa mga pagtulon-an sa Katolikong simbahan.

Angayan nga tan-awon ang katakos sa Korte Suprema sa paghatag sa ilang desisyon ning maong kontrobersyal nga balaud nga daan nang gipaluyohan sa Malacañang. Kun mga itoy pa lang unta sa gobyernong Aquino ang mga mahistrado, dali ra untang nakadapig ang Korte Suprema ngadto sa unsay buot makab-ot sa gobyernong Aquino. Sa pikas bahin kung gibraso pa lang unta sa Malacañang ang pagpakanaog sa desisyon, nigawas untang gipaburan sa mga mahistrado ang tanang nalatid sa maong balaud. Apan sa gipatigbabaw nga desisyon karon, tataw nga gawasnon gyud ang labing taas nga hukmanan sa pag-umol og mga desisyon.

Apan wa’ matapos dinhi ang away tali sa simbahan ug sa estado. Sa gipagawas nga desisyon karon sa Korte Suprema, mas gihatagan ini og igong kagawasan ang duha ka lig-ong institusyon sa pagdani sa mga tawo aron suportahan ang ilang kawsa. Bisan sa pamahayag sa simbahan nga suportahan ang maong balaud, di’ ni igo aron hingpit nang kalimtan ang ilang mga baruganan sa isyu labi na kung panaminan ang desisyon sa Korte Suprema. Ang labing dakong tahas ini, anaa sa hingpit nang pagpatuman sa balaud ug ang katungod sa simbahan kung basehan ang duha ka probisyon nga gitangtang ug gideklarar nga unconstitutional sa simbahang Katoliko.

Makita nato sa mga mosunod nga buwan ug katuigan ang paghatag sa gobyerno og pundo ining maong balaud. Apan mabati ‘sab ang padayon nga pagpukaw sa simbahan sa konsensya sa mga tawo tungod kay kini ang labing dakong gahum nga gipatigbabaw sa Korte Suprema sa pagresolbar sa maong balaud. Ang RH law ang mosukod di’ lang sa baruganan sa duha sa labing dagkong institusyon (simbahan ug gobiyerno). Apan mas sukdon sa maong balaud ang katakos sa matag usa nato nga mosunod sa gidiktar sa atong konsensya.

* **

Email: [email protected] or [email protected]