Buhis na, maging bato pa

Dugay-dugay nga panahon nga nabutang sa alkanse nga sitwasyon ang dakbayan sa Lapu-Lapu tungod sa pagmagahi sa Mactan Cebu International Airport Authority pagbayad og buhis ngadto sa kagamhanan sa maong dakbayan.

Sa paglingkod ni Paz Radaza isip mayor sa maong dakbayan, gi-aswat niya ang responsibilidad pagpahigmata sa hunta direktiba sa MCIAA nga obligado kining mobayad sa Lapu-Lapu tungod kay ang airport anaa mag-operate sa maong dakbayan ug salikwaot paminawon nga ang dakbayan nga maoy nag-host sa tugpahanan gi-alkanse sa nagdumala niini.

     Ang P1.8 bilyones gikan sa real property tax sa MCIA ngadto sa dakbayan makatabang kaayo alang sa pagpabarog og mga classroom, pagpaayo sa kadalanan sa dakbayan nga usa ka tourism hub sa rehiyon, ug pagpahayag sa kadalanan pinaagi sa mga street lighting ug uban pang mga serbisyo sa katawhan.

Pero karong bag-o, nahibulong ko nganong nagkasungi sa ilang baruganan silang Mayor Paz ug mga sakop sa konseho sa dakbayan.

Sumala pa nga ang konseho mihatag og authority pinaagi sa resolusyon kang Mayor Paz aron kolektahon ang P1.8 bilyones nga buhis gikan sa MCIA. Kining maong buhis ihatag sa MCIAA nga wala’y nakapilit nga kondisyon.

Apan unsa kahay nakaon sa mga konsehal o kinsa kahay nag-advise kanila nga gi-withdraw man nila ang authority nga ila untang gihatag sa mayor aron maoy gamiton nga gahum pagkolekta sa buhis nga ikaayo unta sa katawhan?

Apan si Mayor Paz nagkanayon sa mga balita nga wala siya’y nadawat nga kopya sa resolusyon nga nag-withdraw sa authority niya pagkolekta sa buhis.

Dili man ko abogado, apan nakatimaho ko og binuang sa mga konsehal sa Lapu-Lapu. Nganong ila man nga gitagotago ang pag-withdraw nila sa authority? Aron dili makasupak ang mayor pinaagi sa veto batok sa ilang resolusyon pagbakwi sa awtoridad sa mayor?

Kun wala pay nagpahipi nga dautan nga intensiyon, dili unta tago-tagoan sa mga konsehal ang resolusyon.

     Apan taym pa ra gud, dili ba miduyog man kining mga konsehal sa “fight” ni Mayor Paz nga makuha ang buhis nga dugay nang gipugongpugongan sa MCIA?

Pero nganong karon migawas man nga supak hinuon sila nga makolekta sa dakbayan ang maong buhis? Unsa may ilang tuyo, aron maalkanse ang katawhang Oponganon?

Kun moingon ang mga konsehal nga mipirma sa pagbakwi sa awtoridad ni Mayor Paz nga dili sila supak sa pagkolekta sa maong buhis, apan nganong ila mang gipugngan nga makolekta kini?

Kun may angay kalagotan ang mga magbubuhis sa Lapu-Lapu, wala’y lain kanang mga konsehal nga inyong giboto nga karon mura og mosupak na hinuon sa inyong interes pagkolekta sa P1.8 bilyones gikan sa MCIA aron makapabarog og daghang classrooms, makapa-aspalto sa mga karsada ug makapasuga sa mga ngitngit pa nga lugar, ilabi na sa mga isla nga sakop sa hurisdiksiyon sa Lau-Lapu.

Nagduda ko nga adunay naka-advise og dautan sa mga konsehal nga mipasar sa resolusyon pagbakwi sa awtoridad.

Makapahibulong kaayo ang ilang pag-atras-atras sa ilang pagpakigkumbate sa pagkuha nianang dakong kantidad sa buhis nga gidugaydugay sa paghatag sa MCIAA sa kagamhanan sa Lapu-Lapu.

Nagduda gani ko nga nakigkunsabo sa mga opisyal sa MCIAA kanang mga konsehal.

Hinuon, wala’y basehan akong pagduda. Apan bisan kinsa naman mahibulong nganong mikalit lang sila og supak nga makolekta ang P1.8 bilyones.

Sa ila ra ba nga pagsupak, dili sila ang alkanse kay sa ilang kahimtang mahimo silang magsakay sa maanindot nga karsada, ilang mga anak nagtungha sa maanindot nga tunghaan, ug ang ilang mga panimalay hayag kaayo.

Ang dakong alkanse niini mao ang katawhan sa Lapu-Lapu nga nagkinahanglan sa serbisyo nilang mga konsehal.

Unsaon man nila sa pagserbisyo sa mga tawo sa Lapu-Lapu kun mobabag sila pagkolekta sa buhis nga angay unta sa mga tawo?

Buhis na, maging bato pa!