EDITORYAL - Ang RH Law

Maka-avail na gyud ang mas kinabag-an sa   kababayen-an sa klaro ug protektadong Reproductive Health services human ideklarar sa Korte Suprema sa miaging Lunes nga Constitutional ang kontrobersyal nga RH Law.

Ang Simbahan sama sa gihapon di pa makadawat sa desisyon kay giisip nila nga supak sa pagtulon-an sa Kahitas-an ang maong balaod kay lagi mas nakita ang “dautan” nga epekto niini.

Ang gobiyerno nakakita sa pagdako sa populasyon ug masaligon nga kun maka-avail na ang kinabag-an sa kababayen-an sa mga serbisyo nga gilatid sa maong balaod  makatabang kini pagpamenus sa pagburot og samot sa populasyon.

Daghan ang nakasabot sa baruganan sa Simbahan nga ang bisan unsang artipisyal nga pamaagi pagpugong sa pagmabdos sa usa ka babaye usa ka dakong sala.

Apan kung tan-awon usab ang nagkagrabeng problema sa kakabus karon sa nasud nga dili balanse ang gidaghanon sa mga tawo ug sa gidaghanon sa mga trabaho ug resources, mas praktikal siguro nga dunay tamdanan ang tanan.

Ang RH Law maisip nga usa ka tamdanan aron ang tawo dunay opsyon nga maghuna-huna kun  kaya na bang makabaton og mga anak.

Gawas pa niini, proteksyon usab kini sa   kababayen-an gikan sa mga komplikasyon sa pagmabdos aron kamenusan ang mga kaso sa   kababayen-ang nangamatay tungod sa peligro sa pagmabdos.

Ang katawhan gituohan nga dunay kaugalingong panghuna-huna sa pagpili ug paghimo og desisyon alang sa kaugmaon sa pamilya. Kinahanglan lang nga di kalimtan ang mga pagtulun-an sa Simbahan.