Pagka abusado g’yud

Nahisama ko sa plaka nga buak, nagsigi’g balik-balik. Gusto lang g’yud nako nga kahimoan og kausaban ang tinonto aron dili masakripisyo ang katawhan.

Si Joy Tumulak, operation’s chief sa City Traffic Operations Management (CITOM), mitug-an nga ang gikasabotan mao nga anam-anamon g’yud ang pagpang-aspalto sa karsada. Nagpasabot kini nga igo-igo lang ang gitas-on sa karsada nga kaskason sa mga kontraktor nga mahuman nila pag-aspalto sa dili pa ang buntag.

Apan unsay gihimo sa uban nga kontraktor? Gipatas-an hinuon pag-ayo ang bahin sa karsada nga ilang gikaskas ug gibiyaan lang nga wala giaspalto.

Mao kini ang gibuhat sa mga kontraktor sa asphalting project diha sa Veteran’s Drive dapit sa Marco Polo Hotel ug sa Gorordo Avenue gikan sa eskena Escario paingon sa University of the Philippines (UP).

Arang-arang og gamay didto sa Veteran’s Drive kay wala na’y abog, nahurot na pagpanglupad ug nahilam-os sa mga tawo nga luwan tawon sa mga PUJ.

Apan diha sa Gorordo Avenue maluoy ko nga nagtan-aw sa mga pasahero sa PUJ nga namulbos tawon sa mga abog ug namuti ang ilang buhok kay pwerte’ng aboga sa gikaskas nga bahin sa karsada nga gibiyaan ra sa kontraktor.

Unsa gud tawon mo nga pagka-kontraktor? Gihasol-hasol man ninyo ang mga motorista. Ngano’ng gitaas man ninyo  ang giguba nga karsada nga dili man diay ninyo dayon mahuman?

Arang-arang na lang unta kadto kun inyo’ng gilimpyohan sa mga pino nga lapok aron dili makamugna og grabe’ng abog inig-agi sa mga sakyanan.

Ang trabaho ra ba niini’ng mao nga mga kontraktor pagkabati g’yud kaayo. Dili tupong ang karsada aron nga mosirit ra unta ang dagan sa mga sakyanan. Unsa mga libat mo?

Unya, kamong mga inspector sa DPWH, unsa ma’y inyong gihimo ani? Wala lang mo’y himoon? Basta lang anaa’y project nga makita bahala na’g bati?

* * *

Nalipay ko nga nakakita nga duna’y mobile car sa CITOM ug mga traffic enforcer nga nagbantay sa atubangan sa Wine Shop sa Gorordo Avenue nga kanunay’ng daghan ang mamarking daplin sa karsada.

Apan bisan og diha pa ang CITOM, wala gihapon mamahawa kadtong mga motorista kang kansa’ng sakyanan naka-parking na. Ang mga sakyanan nga mi-parking sa “two vehicle” parking space sa mao nga wine shop, nag-parking nga diagonal.

Akong lauman nga pirmihon ni Joy Tumulak ang pagdistino og traffic enforcer diha nga dili mahadlok modakop.