Nakapanglingo-lingo ko pagkasayod nga sa duha ka barangay kang kansang mga kawani gipakalitan og drug test sa City Office for Substance Abuse Prevention (COSAP) niadtong Huwebes walo ang napositibo sa paggamit og shabu. Pastilan, hapit tanang barangay nga gihimoan og drug test sa mga sakop sa COSAP duna g’yuy mapositibo sa paggamit sa illegal nga drugas.
Alang kanako, angay g’yud nga estriktohon nga taktakon sa trabaho kadtong mga kawani nga mamatud-an nga mapositibo sa gidili nga matang sa drugas.
Kinahanglan g’yud nga ang mga kawani sa barangay magsilbi nga ehemplo ug modelo ngadto sa katawhan, ug dili kay sila maoy magpasiugda sa mga binuang.
Akong daygon kadtong mga kapitan sa barangay nga mihukom g’yud nga pangtaktakon ang ilang mga kawani nga namatud-an nga positibo sa gidili nga matang sa drugas.
Lauman nako nga ang baruganan nila ni Kapitan Victor Buendia sa Labangon, Kapitan Lediore “Boy†Miranda sa San Roque ug ang mga opisyal sa Mabolo nga gipangulohan ni Kapitan Reynaldo Ompoc manakud unta sa uban. Sila ra nga mga opisyal sa barangay nga mibarug g’yud dayon nga taktakon nila sa trabaho kadtong ilang mga kawani nga nahibaw-an nga adik sa gidili nga drugas.
Saludo ko sa inyong baruganan mga kapitan!!!!
* * *
Akong balikon pag-awhag ang mga inspector sa DPWH nga ayuhon nila pag-inspection ang pag-aspalto sa mga karsada nga gihimo sa mga private contractors nga ilang gikuha. Nakabantay ko nga daghang bahin sa karsada nga nahuman na “kuno†pag-aspalto sa mga private contractor sa DPWH nga “lubak-lubak†gihapon.
Tan-awa ang giaspalto nga karsada sa Veterans Drive nga duol sa ganghaan sa Cebu Plaza Hotel paingon ngadto sa Barangay Busay, daghang mga wala matupong nga bahin sa karsada. Kun ako ang patan-awon, dili perfect ang trabaho. Aw ambot kun ang mga inspector sa DPWH mubo ra og standard sa project o kaha piyongon nila ang ilang mata aron dili makakita sa hiwi.
Diha ‘sab sa ganghaan sa kilid sa Marco Polo Hotel, mora’g sa ila nga delivery area, nganong ang karsada man ang mo-adjust? Kun tan-awon nimo, ang karsada nga giaspalto gituyo sa pagpahiyak o gipalupa tumong sa ganghaan. Masakripisyo na hinoon ang mga moagi nga sakyanan sa karsada? Binuang nga pagka trabaho.
Alang sa inspector sa DPWH, anha pagbarog sa atubangan sa ganghaan sa delivery area sa Marco Polo ug lantawa paingon sa ubos dili ba makita nimo ang wala magtupong nga pagka-aspalto. Walay klaro nga pagkatrabaho, maayo pa og wala gub-a ang daan nga karsada.