Bulan karon sa graduation day. Usa ang St. Theresa’s College (STC) ang moselebrar niini. Dinhi gikan ang duha ko ka anak, mao nga di gyud kalikayan nga may kasingkasing akong daling matandog sa higayon nga may maayong buhat nga nahimo ang mga ginikanan ngadto sa mga STC students.
Adunay usa ka estudyanteng scholar nga nagtungha sa STC, kinsa mo-graduwar sab sa hayiskol niining bulana. May graduation ball sila. Ug kini adto ipahigayon sa Cebu City Waterfront Hotel and Casino, Lahug, ning dakbayan. Ang maong scholar anak sa pobreng pamilya, kinsa lugsanay ganing makakaon katulo sa usa ka adlaw. Hinungdan, nga gigastohan siya sa usa ka madre, kinsa naluoy sa pait nilang kahimtang. Apan subo lang kaayong pamation, nga sa adlaw nga hapit na mopaso ang maong scholar sa entablado aron pagkuha sa iyang diploma, namatay ang madre.
Wala lang maguol ang batang scholar. Giabot pa gyud siya’g kaikog sa mga concerned persons nga mipadayon pagsuporta sa iyang pagtungha. Mao nga dihang nasabotan sa PTA nga silang graduating students mag-graduation ball sa Waterfront Hotel, dali ra siyang nakadesisyon -- dili siya moapil. Nahunahuna man gud niya sa kadako sa galastohan. Ug dili siya gusto nga mahasol pa ang mga tawong nagsige nag hatag tabang pinansiyal sa iyang pag-eskuyla.
Sa tanan niyang klasmet, ang scholar lang ang di maka-join sa ilang graduation ball. Naluoy ang iyang mga klasmet. Gidala sa mga mahigalaong bata ang mao nilang kaluoy ngadto sa dalunggan sa ilang parents, kinsa gibati sab sa di matukib nga kaluoy human ma-estoryahi sa life story sa scholar. Si Mrs. Amy Caballes, mi-offer sa scholar nga siya na lamay mobayad sa tibuok graduation ball fee alang sa hotel. Apan nakurat si Mrs. Caballes kay duna na diay laing parents nga miangkon niini. Mao kadto nga mipasalig siya nga mao na lay angkon sa bayranan sa rental cost sa graduation ball gown nga magustohan sa scholar.
Miapil sa esena si Zaldy, ang bana. Gidasig ang asawa nga palitan na lang gyud og gown ang maong graduating student. Buwahan, ma-feel kanunay sa bata ang presensiya sa gugma nga ilang gihatag ning talagsaong adlaw nga di na gyud mobalik human moagi. Pagka-sulondon sa gibuhat sa mga Theresian parents ngadto sa mga estudyanteng less fortunate. Kaninyo, Ma’ams ug Sirs, ako mi-thumbs up. Unta, managhan kamo.