Makab-ot na kaha ang kalinaw?

Nagmaya ang tanan sa dihang mipirma na ang kagamhanan sa Pilipinas ug ang Moro Islamic Liberation Front (MILF) ug kasabotan alang sa kalinaw kaniadtong Huwebes. Timailhan kuno kini nga sa katapusan, mosakdap na ang kalinaw didto sa Mindanao.

Isip taga Mindanao, dugay ra kong naglaum sa kalinaw sa akong yutang natawhan. Kini aron sa ingon nga makabaton na kini og tinud-anay nga kalamboan nga hagbay rang gidamgo sa  mga lumulupyo didto.

Apan ang nakab-ot nga kasabotan tali sa kagamhanan ug MILF mao na bay sulbad sa kaguliyang didto sa ikaduhang labing dako nga isla sa Pilipinas? Sinyales na kaha kini sa inanay nga pagbaha sa mga negosyo ngadto sa Mindanao?

Wala pa kita masayod kun unsa ang resulta niining nakab-ot nga kasabotan tali sa gobiyerno ug MILF, ang labing dakong grupo sa mga rebelde’ng Muslim nga naglatagaw karon sa Mindanao.

Mas labing maayo kun mobunga kining maong kasabotan og dakong kalinaw. Kini aron matuman na gayud ang dugay nang pangandoy sa mga taga-Mindanao nga ekonomikanhong kalamboan sa lugar kansang imahe dugay rang giwatas-watas sa kaguliyang.

Apan kun dili kini mobunga og maayong bunga, nan walay laing mabasol kun dili ang mga taga-Mindanao mismo. Kini tungod kay kulang ang ilang paningkamot nga makab-ot ang idlas nga kalinaw. Usa sa mga problema nga akong nakita kun dili gayud mosaler kining maong kasabotan mao ang walay kahiusahan sa mga rebelde’ng Muslim. Gawas sa MILF, daghang grupo didto sa Mindanao ang gusto usab og separate nga estado.

Kining maong grupo dakong supak sa peace agreement tali sa kagamhanan ug MILF. Ug bisan pa man niining kasabotan nga nakab-ot karon, dili sila mohunong hangtud dili usab matuman ang ilang gusto.

Mora’g dinhing tungora nasipyat ang kagamhanan. Wala niini matuhog kun unsa ka importante ang kahiusahan sa tanang mga rebeldeng grupo sa Mindanao aron makab-ot na ang kalinaw didto.

Makapaabot kita nga daghan ang morebenta niining maong peace agreement. Ang Moro National Liberation Front (MNLF) ug uban pa dili gayud makadawat niini gumikan kay wala silay parte sa negosasyon. Bisan pa man niini, ato lamang iampo nga sa katapusan mosakdap na ang kalinaw didto sa giingong yuta sa saad.