Espiya sa BIR
Way kalibotan ang inilang doktor sa Sugbo nga nisagol sa nagpunsisok nga mga pasyente sa iyang klinika si Hermeno Palamine, ang direktor sa Bureau of Internal Revenue (BIR) sa Central Visayas. Kinsa nigamit sa iyang cellphone paghulagway sa listahan sa mga pasyente ug sa ilang priority numbers. Naka-ihap siya og labing menos 25.
Matud ni Palamine ang iyang gihimo kabahin sa pagsusi sa aktuwal nga gidaghanon sa mga pasyente sa mga doktor, sa mga kliyente sa mga abogado ug ubang mga propesyonal ug sa mga kustomer sa mga bay patigayon. Nitataw siya nga di kapasanginlan ang BIR nga nagmatamata sa ilang pasangil nga wa magbayad sa tukmang buhis ang mga propesyonal ug mga negosyante.
* * *
Di tinuod matamata ni pangispiya ang sukaranan sa BIR sa pagmantala sa kagamay sa buhis nga gibayran sa mga doktor sa Sugbo kun itandi sa buhis sa mga magtutudlo sa mga eskuylahang publiko. Gitagsa-tagsa gyod sa mga kawani sa BIR 7 paghukngay ang income tax returns (ITRs) sa mga doktor sa nangaging katuigan.
Tungod sa kadako sa kang-a tali sa ITRs ug sa tinuod nga kahimtang sa ilang mga klinika, gisuwatan ni Palamine ang mga doktor nga klarong wa motug-an sa tinuod nilang kita. Wa manghulga og kiha ang mga suwat nga nadawat sa mga doktor, igo lang nangayo sa mga dokumento sa ilang buhis nga hagbay rang nasubay sa BIR.
* * *
Niangkon hinuon si Palamine nga tungod sa kakuwang sa mga kawani sa BIR 7 di dayon nila masuwatan ang tanang doktor ug ubang mga propesyonal ug mga negosyante. Nipasabot si Atty. Neri Yu, pangu sa legal department sa BIR 7, nga una nilang gisuwatan ang mga doktor nga klarong way kaikog.
Kay gawas nga klarong nipahiyos sa ilang kita naningil pa gyod og refund pinaagi sa pagpangangkon nga mas dako ang ilang gasto sa pag-suweldo sa mga kawani sa ilang klinika kay sa ilang nadawat nga bayad gikan sa mga pasyente.
* * *
Gipanghimakak ni Palamine nga mga doktor ray gipuntirya sa shame campaign sa BIR. Nipagawas na sila sa niaging tuig og full page ads sa nasudnong mga pamantalaan nga nagbutyag sa kagamay sa buhis nga gibayran sa accountants ug mga abogado. Wa hinuoy bisan usang nikisikisi niadtong higayona.
Di sab mga klinika sa mga doktor ray gisuroy ni Palamine. Kausa, nakakaon siya sa restaurant nga wa mohatag og opisyal nga resibo. Dihang gipangutana niya ang tagduma, diriyot mahagbong si Palamine sa iyang lingkoranan kay giingnan nga dugay na silang nagsige og apura apan ang BIR maoy langayan. Diriyot makapaila si Palamine sa iyang kaugalingon. Apan nakahunahuna nga mas maayong timan-an una ang ngan sa restaurant. Ug gipadad-an dayon og mga inspektor.
* * *
- Latest
