DPWH gising!!!

Angay’ng sawayon gayud ug silotan kining kontraktor nga gikuha sa Department of Public Works and Highways (DPWH) aron pag-aspalto sa karsada nga kabahin sa Veterans Drive duol sa Marco Polo Plaza Hotel kay gigasang-gasangan nila unya gibiyaan unom na ka adlaw.    Atensyon DPWH District Engineer Nicomedes Leonor, palihug sutaa kun kinsa kini nga kontraktor nga nagpabaya lang sa ilang katungdanan. Kamaayo sa karsada diha duol sa main entrance sa Marco Polo apan giguba g’yud unya gibiyaan lang.

 Kun pangutan-on nimo ang mga motorista nga mag-agian diha kanunay paminaw ko maputos kamo sa pagsaway. Kun makapatay pa ang pagsaway tingali dugay ra kamo nga nangamatay. Kabastos gud ninyo, ang maayo nga karsada inyong giguba unya biyaan lang?

 Angay’ng pasabton ninyo ang publiko kun ngano nga giguba ninyo ang karsada unya gibiyaan nga wala tiwasa. Unom ka adlaw na nga gibiyaan kini. Anaa ko mag-agian sa mao nga karsada mata’g adlaw.  Unya, kining mao nga kontraktor nakalapas usab kini sa lagda kay wala magbutang sa ngalan sa ilang kompaniya aron unta masayod ang publiko kinsa sila nga nag-undertake sa proyekto, pila ang kantidad sa kontrata ug kanus-a nila humanon.

 Unya, kinsa ba ang supervisor sa DPWH nga nag-monitor sa mao nga proyekto? Utro ka pa nga gahalhal lang. Maayo ka lang mokumkom sa sweldo nimo sa kagamhanan apan wala magtagad. Kun ingon man niini nga ang maayo nga karsada gub-on ug biyaan lang, maayo pa’g wala na lang gub-a?

 Tan-aw nako, nangita lang g’yud kining ubang mga tawo nga maka-project aron maka-komisyon. Giuna hinoon sa pagguba ang karsada nga maayo pa, apan ang V. Rama Avenue nga pwerteng kadakal-dakalon wala unaha.

* * *

Usa ka semana na gikan niadtong nagubot nga duwa sa Football kaniadtong Domingo atol sa Under-18 Aboitiz Cup.

Si Enrico Mongaya gipasanginlan nga mihapak sa ulo sa goalie sa Alcoy FC ug gidabo-dabohan pagsaway sa kadaghanan kay gipasanginlan nga maoy nagsugod sa kasamok.  Apan ang batan-on nga football player gikan sa Sacred Heart School  Ateneo de Cebu pwerteng nakapasalamat ni Mongaya kay gihulagway niya nga kun wala pa ang maong tawo, tingali patay na siya.

Matud sa football player sa Sacred Heart nga atol sa ilang duwa gi-headlock na siya sa 5’7 nga goalie gikan sa Alcoy FC ug naglisud na siya’g ginhawa. Kay daku man og lawas ang player sa Alcoy wala g’yud makalihok ang taga Sacred Heart.

Mao diay nga si Mongaya midali pagresponde ug mihimo’g lakang aron ang goalie sa Alcoy dili makapatay ug ang football player sa Sacred Heart dili mamatay. Sa paugnat sa kusog dili pinatyanay, mao nga naninguha lang si Mongaya nga malikayan ang dautang hitabo. Basin uwahi ra ang pagbasol.