Matud sa mga eksperto, ang tawo nga mahigalaon, mapahiyumon, gaan ang kabubut-on, malipayon, may positibo nga panghunahuna ug himsog ang hiyas sa pagkatawo. Dili lisod ang makighigala, bisa’g mga bata kaantigo na niini. Mao bitaw kadaghanan adunay daghang higala. Gawas niadtong pipila sa mga talagsaong tawo nga dili mahilig makighigala, kay kuyawanon, maglabad ang ulo makig-atubang sa tawo. Sagad nila ini adunay mga kakulian sa pagkatawo.
May mga tawo usab nga masaypan natong garbosohon bisa’g nahigala na nato, di gyud makigsuod. Kay diay adunay gipamatyag sa panglawas, maong na ingon siya ana, sama sa nerbiyos, maglain ang gipamati, malipong o kaha ingon sa malisang kun may makitang tawo nga maoy nakapamugna sa iyang negatibong pagtratar sa panaghigalaay. Maoy permi bation ang kabalaka ingon sa dili mahimutang, way kompiyansa bisan pag suod pa niyang higala.
Ang tiunay nga higala, kabahin na sa atong kinabuhi. Kadangpan sa tanang higayon, nga kapangayoa’g maayong hunahuna ug katambayayong sa inadlaw natong gimbuhaton niining kinabuhia. Siya ang kasandigan sa panahon sa mga panginahanglan. Unsaon man sa pag-ila o unsay buhaton nga mahimong tiunay nga higala sa atong kahigalaan? Kini ang angay natong hatagan sa pagtagad:
(1) Kanunay may komunikasyon – magkumustahay aron mapabati ang kahidlaw sa pagbinatiay, isip pagpalig-on sa panaghigalaay.
(2) Adunay respeto sa usa’g-usa – mainampingon sa pagpadayag sa opinyon o suhestyon, aron kalikayan nga may masilo nga kabubut-on.
(3) Mamahin sa kahigayonan – manggihatagon sa mga butang nga magdulot og dakong kapuslanan. Kanunay ilabot sa mga maayong kahigayonan.
(4) Manginlabot sa pagpakabana – May inisyatibo sa paghimo’g mga situwasyon o proyekto nga makapalambo sa relasyon isip maayong higala.
(5) Hugot ang simpatiya sa paglaban – nga manalipod nga ibarog ang baruganan sa katarong ug kaangayan sa pag-unong sa buot kab-oton.
(6) Mapagmahal nga masinabuton – Kini maoy dugokan sa katam-is sa malungtarong pagsinuoray nga mapabatyag ang tiunay nga higala.