Nahitabo sa Ukraine kapanaminan kaayo

Ang nahitabo sa Ukraine karon angay kapanaminan sa nasud sa Pilipinas: nga sa ingon kadali, ang usa tipik sa teritoryo, mahimong bawion sa mas gamhanan ug mas dako nga nasud.

Ang Crimea nga usa ka independent ug autonomous state nga sakop sa Ukraine, usa na karon ka “annex state” sa Russia human sa referendum niadtong Domingo diin ang mga residente sa Crimea miboto pabor sa pagbalhin ngadto sa Russia kay sa pagpabilin sa Ukraine.

Nagtuo ko nga kining tanang nanghitabo sa Ukraine giplano nang daan sa Russia sugod niadtong desisyon sa ilang presidente nga si Viktor Yanokovych nga ibalhin pagpasakop ang Ukraine gikan sa European Union (EU) ngadto sa Russia.

Si Russian President Vladimir Putin nakahibalo nang daan nga ang mga nasud sa Europa ug sa Amerika mobuhat sa angay buhaton aron magpabilin ang Ukraine sa EU, apan mibuto ang dagko kaayong mga demonstrations pagsupak sa pagbalhin sa Ukraine ngadto sa Russia.

Gigamit ni Putin ang kagubot sa mga demonstrations sa Kiev aron makapresentar og rason nga kunohay protehian niini ang mga Ethnic Russians ug Russian-speaking nga mga residente sa Ukraine hinungdan nga iyang gipasulod sa Crimea ang mga tropang Russian.

Sa wala nanghimakak si Putin nga gubat iyang tuyo, apan dali kaayong naka-eskedyul og referendum ang Parliament sa Crimea pagpili kun pabilin ba sila sa Ukraine o mobalhin sa Russia.

Ang Crimea usa ka strategic nga lugar alang sa Russia tungod kay anaa dinha ang mga barkong iggugubat sa Russia ug duol kaayo kini sa Black Sea.

Dinhi sa ato sa Pilipinas, dili lisod alang sa China kun tuyo nilang hilabtan ang Pilipinas aron makuha ang mga tipik sa atong teritoryo nga giilog usab sa maong nasud ug sa ubang mga nasud.

Ang katawhang Pilipino nasayod nga wala kitay ikabuga bisan “ata” man lang aron ikasukol sa China.

Busa, dili na kuwestiyon alang sa kinabag-an kun angay ba o dili ang pagpasulod sa mga tropang Amerikano dinhi pinaagi sa US troops deal karon diin tugotan ang mga Amerikano nga makagamit sa mga base military sa Pilipinas.

Aduna na kitay mga dautang mga kasinatian sa dihang dinhi pa sa Pilipinas ang base military sa Amerika. Igo na kaayo ang atong mga nakat-onan kaniadto sa pagpanday og mga kondisyon aron dili usab masakripisyo ang atong kaugalingnan (sovereignty) taliwala sa atong pagdawat sa mga sundalo sa Amerika.

Lisod man tinuod nga mahitabo dinhi sa ato sa Pilipinas ang nahitabo sa Ukraine karon nga nawad-an na sila og Crimea niining panahona. Apan dili usab imposible nga ang atong kontrang nasud nag-drawing og mga eksena nga makapa-escalate sa tensiyon tali sa duha ka nasud aron madesisyonan ang kapanag-iyahan sa mga islang giilogan pinaagi sa kagubot.

Magbantay lang ta.