Tulo ka brokers angay kasohan og smuggling

Maayong limpyohon sa retiradong heneral nga mao karoy district collector sa Bureau of Customs - Port of Cebu ang iyang hurisdiksiyon batok sa tulo ka mga broker nga giingong nalambigit sa pag-import og mga ginamit nga mga sakyanan ug makina ug chassis, jet ski, motorsiklo, generator sets, gikan sa Japan.

Kining tulo ka mga broker nga nagsugod ang ilang apilyedo og letrang “A” dili pa nato mabutyag ilang kumpletong ngalan mentras nagpadayon ang imbestigasyon sa team nga gitahasan sa Office of the Commissioner sa Manila pag-raid sa usa ka yarda sa Yati, Lilo-an.

Hilabihang kadaghan nga mga right-hand drive nga mga sakyanan ug mga makina ug chassis niini ang nasakpan sa yarda sa grupo nilang COOV Gil Buzon, COOIII Verlito Ajos, Customs police Enrico Mongaya, Alfredo Regidor Jr., CIIS agents Ronnie Antonio Ylaya ug Ferdinand Laraga.

Si District Collector Roberto Almadin dili lang mohunong sa pag-isyu og Warrant of Seizure and Detention (WSD) kon dili kinahanglang iyang imbestigahon kadtong tulo ka mga broker nganong nakalusot kining ingon niining klase sa kargamento.

Maayong i-apil sila sa kasong smuggling ilabi na nga ang tag-iya sa yarda nga T.E.S. Enterprises nga giila sa after-operation report ni CIIS chief Arneth Von Carmen Manquiquis nga usa ka Evelyn Quijano Alforque, wala makapresentar og mga ebidensiya nga nakabayad kini sa hustong duties and taxes alang sa maong mga kargamento nga nagpasad sa yarda.

Samtang maayong pangitaon usab ni Almadin kinsa nga mga opisyal sa Customs ang nalambigit sa pagtabang niining maong operasyon sa T.E.S. Enterprises.

Nagtuo ko nga interesado ang BOC sa kauluhan nga adunay importer ug brokers nga makasohan gikan dinhi sa Sugbo, ilabi na nga positibo ang resulta sa Letter of Authority nga giisyu ni Customs Commissioner John Sevilla nga gi-address sa mga tinugyanan sa BOC-Cebu human sa pagpangronda sa yarda ni Alforque.

* * *

Ang shame campaign sa Bureau of Internal Revenue nga nagpunting sa mga abogado, doktor ug uban pang propesyonal mi-backfire ngadto kanila.

Sa maong pamaagi sa BIR pagpahibalo sa mga tawo nga gagmay ra kaayo og buhis ang nakuha sa kagamhanan gikan sa mga propesyonal nga dagko kaayo og mga professional fees nga dili gani resibohan, gihulagway nila ang magtutudlo nga nagpas-an sa doktor o abogado.

Apan sa mga social media, ilabi na sa Facebook, adunay mga grupo nga mihimo og laing paghulagway, gihimo nila ang shame campaign sa BIR pagsulti sa tinuod nga sitwasyon sa nasud pinaagi sa pagpakita sa hulagway sa usa ka magtutudlo nga nagpas-an kang Pres. Noynoy Aquino, Budget Sec. Butch Abad ug BIR Commissioner Kim Henares.

Nagpasabot ang maong kampanya nga dili ang mga propesyonal ang nagpabug-at sa mga Pilipino, kun dili ang pamaagi sa Aquino administration pagdumala sa Pilipinas nga hilabihan ka-estrikto nga wala sa lugar sa pagpaningil og buhis.

Apan tungod lagi kay misumbalik man ang shame campaign sa BIR ngadto sa pamunoang Aquino, gi-ulog-ulogan dayon sa Malacañang ang mga trabahante nga nagsuweldo lamang og minimum nga paubsan ang ilang income tax nga 32 porsiyento sa pagkakaron.

Apan pustaanay pa, dili na mahitabo sa kasamtangan nato nga gobyerno nga hilabihan ka-laog og buhis.

Tinuod gyud nga sukad milingkod si Noynoy, adunay dakong epekto sa mga tawo, ilabi na kadtong nag-ilaid sa kalisod, ang palisiya niini sa buhis.

Kaniadto pa nga gisinggit sa mga tawo nga pakubsan kun dili man kuhaon kanang 12 porsiyento nga VAT sa gasoline ug pagkaon, apan nasilawan ang mga opisyal sa gobyerno sa gidak-on sa mahanaw kun himuon kini. Apan, ang resulta, ang kita niini dili na gani ma-account asa paingon ug unsay gihapakan.

Ang kinatibuk-an kita sa buhis nga nakolekta sa BIR nausik lamang tungod kay napunta sa pork barrel sa mga magbabalaod. Adunay mga sakop sa Liberal Party, Nationalist Peoples Coalition ug uban pang partido nga alyado sa presidente nga apil sa pork barrel scam, apan silang mga senador Juan Ponce Enrile, Bong Revilla ug Jinggoy Estrada lamang ang gigukod nga nalambigit sa pamulsa sa kuwarta sa katawhan uban ni Janet Lim-Napoles.

Kun nakabantay kamo, wala na gyud makalabalik sa naandan nga presyo ang atong mga humay ug mais. Tungod kini sa palisiya sa gobyerno pinaagi sa Departmernt of Agriculture ug National Food Authority nga mag-import na lang, samtang mahal kaayo ang duties and taxes nga ipatong niini.

Bisan unsa kadako sa matigom sa Pilipinas, padayon gihapon nga dili ma-maximize ang paggamit niini tungod kay dako gihapon nga porsiyento ang maadto sa kurapsiyon bisan sa pagkabaniog na sa pork barrel nga miresulta sa pagka-scrap niini.

Gani, ang Malacañang hangtod karon nagmagahi sa pag-undang nianang Disbursement Acceleration Program (DAP) nga gihulagway’ng mas taas nga klase sa kurapsiyon sa ehekutibo. Ubos niining DAP, ang presidente, pinaagi sa budget secretary, adunay halapad nga gahum sa pagliko sa pundo nga dili magamit sa proyekto, aron sila na ang magbuot asa ihapak. Busa, bisan unsang klaseng shame campaign nga himuon ni Henares, isumbalik gihapon kini sa katawhan ngadto kanila kay nasayod sila unsay tinuod nga sitwasyon.