Dear Atty. Divine;
Maayong adlaw ug hinaut nga anaa ikaw sa kapiskay sa imong panglawas ug ang imong tibuok banay. Nagpasalamat kaayo ko sa imong column nga napatik sa Banat News kay nakahatag kini og dakong tabang ngadto sa katawhan nga kulang og impormasyon mahitungod sa balaud ug kuwang sa kuwarta aron moduol og abogado pagkonsulta sa iyang problemang legal.
Aduna ko’y problema sa among pamilya labot sa gibilin nga yuta sa among amahan ngadto sa among duha ka igsuon nga pinasikad sa Holographic Will. Ang akong pangutana unsa man gyud ang saktong lagda sa Holographic Will kay nasuta man gud namo nga ang gibilin sa among amahan nga Will way petsa?
Kun way petsa makonsiderar ba nga way gibug-aton ang maong Will? Tinuod ba nga kun dili ma probate ang maong Will wa sab kini importansya? Kinsa man diay ang moprobate niini, ang gihatagan sa yuta o ang na-argabyado?
Hangtud kanus-a nila mamahimong makuptan ang maong yuta? Hinuon pagkakaron kaming tanan ang nagpahimus sa maong yuta apil na ang among duha ka igsuon nga maoy gihatagan niini. Magpaabot ko sa imong tubag. Daghang Salamat. God Bless and more power to your advocacy in helping the people.
Respectfully yours.
Joveniano
Dear Joveniano,
Kang Holographic Will usa kana ka Will nga hinimo sa usa ka tawo nga adunay kabtangan nga gustong ibilin. Basi sa Article 810 sa atong Civil Code, ang Holographic Will kinahanglan nga ang tibuok niini sinuwat gyud sa kamot sa nag-execute, kinahanglan nga adunay petsa ug kinahanglan nga pinirmahan gyud sa testator kon tawo nga maoy naghimo niini.
Ang Holographic Will wa magkinahanglan og pirma sa mga testigo ug wa sab magkinahanglan og notaryo. Buot ipasabot nga ang importante gyud ang petsa ug pirma sa Holographic Will busa kun way petsa ang maong Will nga gibilin sa inyong amahan hayan mamahimo kini ninyong questionon ang kabalido niini. Gawas pa, basi sa atong balaud dinhi sa Pilipinas ang Last Will kinahanglan gyud nga ipa probate whether Holographic Will kini or notarized Will, buot ipasabot nga ang gitudlo nga executor niini mopasaka og Petition ngadto sa korte aron paaprobahan ang maong Will. Ang Korte mohimo ug hearing pagsuta kun iya ba gyud sa testator ang pirma og ang agi sa nagsuwat ug kun natuman ba ang hustong lagda sa paghimo og Will.
Atol sa hearing kadtong wa maapil sa Will mamahimo nga mo-question niini. Pareha sa inyong sitwasyon nga duha ra ka igsuon ang gibinlan og yuta basi sa iyang Will ug wa maapil ang uban, dili kana mamahimong ikapatuman kay basi sa balaod ang tanang anak makonsiderar nga compulsory heirs ug dili mamahimong mahikawan sa ilang bahin kay dapat gyud na sila in equal share ang tanang mga anak. Busa kay kanang maong Will wa man mo maapil ug wa sab ma probate sa korte then dili gyud kana mamahimong ikapatuman. Ang maayo ninyong buhaton karon mao ang pagbahin in equal share kamo tanang magsuon sa kabtangan nga gibilin sa inyong amahan pinaagi sa pag- execute og Extra-Judicial Partition. Hinaut nga akong natubag ang imong pangutana ug daghang salamat sa imong pagsunod kanunay sa atong column sa Banat News. —Atty. Divine
Kun ikaw adunay pangutana may kalabutan sa problemang legal, palihug lang sa pagpadala sa imong pangutana sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana matag adlaw’ng Miyerkules ug Domingo.