Trahedya sa kahanginan

Sa akong pagsulat niini, kamulo pa nga gisuhid sa otoridad ang kadagatan sa Southeast Asia alang sa nawalang eroplano sa Malaysia. Usa ka semana na ugma sukad sa pagkahitabo sa maong insidente.

Kaniadtong Marso 8 sa buntag, milupad ang flight MH370 gikan sa Kuala Lumpur paingon sa Beijing sa China lulan ang 239 ka pasahero. Basi sa taho nga linaw kuno ang panahon niadtong tungora.

Apan samtang naglupad kini sa kahanginan, kalit lamang kuno kini nga nawala gikan sa radar. Hangtud karon wala pa igkita ang maong eroplano. Gani gituohan kini nga na-crash hinungdan sa iyang pagkawala.

Matud pa, ang pagsakay sa eroplano maoy labing safe nga klase sa pag-travel. Kadaghan na kita nakadungog og disgrasya sa kadalanan ug sa dagat. Apan talagsa ra kita makadungog og mga trahedya sa kahanginan.

Apan bisan pa man niini, mas klarong gikahadlokan ang trahedya sa kahanginan sama sa paghagsa o pagbangga sa mga eroplano. Kini tungod kay hilabihan ka gamay ang tsansa nga mabuhi pa ang mga pasahero.

Hinuon, matud sa mga eksperto, ang takeoff ug landing mao lamang ang kuyaw nga bahin pagbiyahe sa eroplano. Kon anaa na kini sa kahanginan, safe kuno ang usa ka eroplano, matud pa nila.

Apan, samtang maglupad ang eroplano, delikado usab kini sa hijacking, mechanical error ug pilot error nga posibleng mosangpot sa pagkahagba niini. Hinuon, matud pa sa mga aviation experts, talagsa ra kini mahitabo.

Dili gayud nato matag-an ang panahon. Gani ang maong eroplano sa Malaysian Airliner nga nawala usa kuno kadto sa labing moderno. Ug dakong talinghaga ang naglikos sa pagkawala niini.

Samtang wala pay konkretong resulta sa imbestigasyon pagkahanaw sa maong eroplano, ang maong insidente angay nga himuong panig-ingnan alang sa atong otoridad pagsuta kun unsa ba gayud ka safe ang air travel sa Pilipinas.

 Kini tungod kay atong gipanghinaut nga dili na masubli ang maong trahedya sa kahanginan, ilabina dinhi sa Pilipinas.