Ang kamunggay

Ang kamunggay kon malunggay sa Tagalog utan kon utanon sa pobreng Pinoy. Apan mao na kining bida karon sa tanang utan kay gihimo na man nga “national vegetable” ubos sa balaudnon nga nasang-at sa Ubos Balay Balauranan.

* * *

Ang balaudnon nga mideklarar sa kamunggay nga “national vegetable” kon nasudnong utan nakapasar na sa tulo ka pagbasa sa House of Representatives. Ang author niini mao si Rep. Gina de Venecia sa Pangasinan.

* * *

Dungan sa paghingan sa kamunggay nga nasudnong utan kon utanon, gideklarar usab ang Nobiyembre nga “National Malunggay Month.” Ang kamunggay kon malunggay nga nailhang utan sa mga pobre, giila baya sa World Health Organization nga “low cost health enhancer” sa mga kabus nga kanasuran.

* * *

Ang labing unang Filipino nga atong nahibaw-an mi-promote sa kamunggay gawas sa atong nasud mao si Dr. Florentino Solon, ang Sugbuanong nutrition expert sa United Nations.

* * *

Gipalambo kini ni Dodong Solon didto sa kanasuran sa Africa diin ang katawhan nagkinahanglan og masustansya nga pagkaon. Kahinumduman nga si Dr. Solon nahimong mayor sa dakbayan sa Sugbo diin siya gitudlo ni kanhi Presidente Marcos.

* * *

Karon kay nahimo nang nasudnong utanon ang kamunggay, angay nang palamboon sa atong kabarangayan. Sayon ra kaayong itanom ang kamunggay. Itisok lang sa yuta ang usa ka sanga niini mabuhi na.

* * *

SA LAING  BAHIN... Magtanum kita’g kamunggay sa atong backyard. Dili kita magpunay og pangayo kay masayon ra man kini nga itanom ... Daghang salamat sa atong mga news dealers kinsa maoy kaabay nato sa pagpalambo sa atong mantalaan.