Miulbo ang kaguliyang didto sa dalan Sanciangko eskena Leon Kilat kaniadtong Sabado sa gabii dihang nanukol ang mga sidewalk vendors sa mga sakop sa City Hall Clearing Team.
Kinsa may moguwa nga hawod sa ilang away? Natural nga ang mga kawani g’yud sa City Hall kay kun moabot na ang kapolisan kadtong mga misukol kanila mao man g’yud ang pangdakpon.
Tuod, adunay mga sidewalk vendors nga gipangdakop. Angay g’yud unta kaloy-on kining mga naninda sa aseras apan kun sila pasagdan na lang ‘sab, asa na man lang moagi ang mga tawo?
Kun ang mga tawo adto na moagi sa karsada kay maglisod man sila paglakaw sa aseras, kuyaw kaayo alang kanila nga madam-agan sa mga sakyanan.
Sigurado usab nga ang sunod nga moreklamo mao ang mga traffic enforcers. Sa laktod, samtang usahay dili kaayo estrikto ang atong mga tinugyanan sa City Hall pagpatuman sa balaod, kamong mga sidewalk vendors ayaw ‘sab pagpasuwabi sa inyong abuso.
Ang pagpatuman og estrikto nga lagda sa mga naninda sa aseras makaapekto kini sa pipila ra ka tawo apan kun hawanan ang aseras gikan sa mga miabuso na sa gihatag kanila nga prebilihiyo, daghang katawhan ang mangalipay.
Kini maoy angay’ng timbang-timbangon pag-ayo sa mga sakop sa Clearing Team sa City Hall kun asa sa duha ka dalan ang ilang subayon.