Sa Pampanga, hepe sa Criminal Investigation and Detection Group ug mga sakop nadakpan sa anti-illegal drugs operations nga gihimo sa ilang mga kauban. Matud pa sa report ilang i-recycle ang ilang mga masakmit nga ebidensya, buhian pa ang drug lords bugti nga mobayad sa ilang kagawasan.
Maayo na lang nga sila nadakpan ug nahipos na gyud gikan sa ilang dautang mga binuhatan. Apan pila pa kaha ka mga law enforcers ang nalambigit niini ug kanus-a pa kaha ni sila mahipos.
Mao ni usa sa mga rason kun nganong lisod puohon ang problema sa illegal drugs dinhi sa nasud. Dunay mga tigpatuman unta sa balaod nga mao pa hinuoy ngilngig sa pag-negosyo og illegal.
Kini maoy hinungdan nga di na ikatingala kun nganong wa kaayo’y mga impormanteng motabang sa atong mga awtoridad bisan na lang sa paghatag og impormasyon bahin sa illegal drugs sa ilang mga dapit.
Magduha-duha na man kadtong mga tarong nga molupyo kung kinsa kaha sa mga awtoridad ang "safe" nilang kasumbongan o kahatagan og impormasyon sa kahadlok nga kakunsabo pa hinuon maoy ilang matug-anan, pwerteng pataya.
Usahay ang mga tawo di na kaayo malipay bisan og duna pay dinakpan nga mga tigpayuhot og illegal nga drugas kay di man usab maayo ang paagi ug di pinasubay sa proseso ang paagi sa pagkasikop.
Unya duna pay daghan sa palibot nga angayan pud unta nga sikupon apan wala lihuka. Mao na nga ang publiko mura na lang og "gikubalan" ug naanad na nga duna silay silingang mga drug pushers ug di na lang magpakabana.
Ang kampanya sa illegal nga drugas di unta 'drama' kay di tiaw ang epekto niini sa katilingban.