EDITORYAL - Softdrinks sa eskuylahan

Idili na ang pagbaligya sa mga softdrinks sulod  sa mga eskuylahan. Kini maoy unod sa House Bill 4021 o ang Healthy Beverage Options Act of 2014 nga gisugyot  nila ni Rep. Leni Robredo sa Camarines Sur, ang biyuda ni anhing Interior Secretary Jessie Robredo ug ni Rep. Arlene Bag-ao sa Dinagat Islands.

Ang tumong sa maong balaudnon nga dili na ma-expose pa ang mga bata sa mga wa kinahanglana ug peligrosong mga kemikal diha sa mga ilimnon sa linghod pa kaayo nilang mga lawas.

Matud pa sa duha  ka kongresista nga base sa mga pagtuon nga ilang gihimong suporta sa balaudnon, walay makuhang kaayohan gikan sa maong mga carbonated softdrinks ug soda drinks apan dunay mga pagtuon nga may mga sakit nga nakuha tungod sa pagsige og inom niini.

Sa mga eskuylahan, gitudlo ang "Go", "Grow", "Glow" nga food groups. Kini ang giisip nga batakang sumbanan sa balance diet alang sa maayong panglawas.

Kung seryoso pa ang mga magtutudlo sa ilang gipangtudlo, wala na man siguro kinahanglana pa ang maong balaudnon.

Sila pa lang daan mahimo na nilang himuong polisiya sa campus nga bawal ni nga mga matang sa  ilimnon.

Dili lang usab ang mga magtutudlo sa eskuylahan, hasta pa gani ang Local Government Units ilabi na ang mga barangay officials, duna say kaakohan pagdili niini  gawas sa mga eskuylahan.

Magkinahanglan pa gyud diay og usa ka balaod aron seryosohon ang mga leksyon diha sa eskuylahan? Pagkaanugon sa kahago sa mga magtutudlo kung sila mismo wala mobuhat sa ilang mga gipangtudlo.