Enero 27,2014 gibombahan og water cannons sa Chinese Coast Guards ang duha ka fishing boats sa mga Filipino didto sa Bajo de Masinloc o Panatag Shoal nga mas naila sa mga maritime maps nga Scarborough Shoal.
Ang Department of Foreign Affairs misang-at og "diplomatic protest" ngadto sa embahada sa China apan gibasura lang kini sa mga Chinese officials.
Ang Panatag nahimutang 220 kilometros gikan sa Luzon, nasulod pa sa 200 nautical miles (370 kilometro) Exclusive Economic Zone (EEZ) sa Pilipinas.
Ang labing duol nga Chinese land mass gikan sa Panatag Shoal mao ang isla sa Hainan, apan 650 kilometros ang gilay-on niini.
Ang paglaom na lang sa Pilipinas mao ang United Nations Convention on the Law of the Sea (UNCLOS), nga gi-isnab usab sa China bisan pa og usa sila sa mga signatories sa maong kasabotan. Gusto nilang bilateral ang sabot-sabot nga klaro kaayong sila ray makapabor.
Mibahad pa sila nga mo-withdraw sa UNCLOS kun di pabor nila ang resulta. Gilauman hinuon nga makaapektar kini sa imahe sa China sa international community.
Ang Chinese government nag-atubang og duha ka mga pressures, ang internal pressures gikan sa ilang gutom nga populasyon nga gibalahan og maayo sa ilang propaganda ug ang international pressure aron ipakita nila nga usa sila ka responsableng superpower.
Demalas lang nga ang Pilipinas nga dunay daghang resources maoy gipili sa China nga daug-daogon gumikan ba kaha sa kahuyang niini gikan sa mga lider, gobiyerno, militar ug uban pa.