Wala gyuy kausaban

Biyente otso ka tuig ang nakalabay, napalagpot sa mga Pilipino ang pamilyang Marcos gikan sa diktadoriyang pagdumala sa Pilipinas tungod sa EDSA People Power revolution.

Human i-exile si anhing Ferdinand Marcos, iyang asawa ug mga anak paingon sa Hawaii, gituboy sa katungdanan pagdumala sa renda sa pangagamhanan ang asawa ni anhing Senador Ninoy Aquino nga si Cory Aquino. Sulod sa 14 ka tuig nga pagdumala ni Marcos, ang Pilipinas gikasuyaan sa ubang nasud sa Asya tungod sa paspas nga pagtubo sa ekonomiya niini.

Galing kay nahimong hakog sa gahum ug bahandi ang pamilyang Marcos mao nga ang diktador mideklarar og Martial Law aron makapadayon sa paglingkod isip lider sa nasud. Dungan niini, misaka ang human rights abuses, daghang sakop sa oposisyon ang gipamatay ug nangahanaw ug labaw sa tanan, daghang mga katungod sa katawhan ang gipamugngan sa tuyo nga dili masupak ang kagustohan sa diktadoriya.

Apan walay molalis sa kamatuoran nga hilabihang kangilngig sa Pilipinas niadtong mga panahona nga si Marcos pa ang presidente.

Apan nagsugod og katikyaob ang Pilipinas sa paglingkod ni Cory; mga adunahang pamilya gipanghatagan og pabor sa mga negosyo sama sa usa ka TV station nga na-sequester pabor sa kagamhanan sa panahon ni Marcos, giuli ngadto sa tag-iya niini nga wala gani usa ka dako nga gibayad sa gobyerno.

Human milingkod si Cory, napanday ang 1987 Constitution. Dinhi niining maong Batakang Balaod nalatid ang mga probisyon nga maghan-ay (unta) sa hustisya ug kaangayan. Sama sa patas nga pag-angkon sa bahandi sa nasud, ug proteksiyon sa mga mamumuo, mag-uuma ug sa ubang kinaubsang sektor sa katilingban.

Pero hain man kining mga probisyona karon?

Ang mga oligarko sa nasud maoy nanghawod sa mga negosyo sama sa komunikasyon, utilities sama sa tubig ug kuryente ug maoy nagbuot sa presyo sa produkto.

Kining mga negosyante nga nagpakadato ug kanunay’ng magpa-uraray sa abroad gamit ang ginansiya sa ilang negosyo sakit sa ilang galamhan kun dili sila makapanglupig sa mga trabahante.

Ang yano nga namuhi og baboy luokon intawon sa mga middle man ug sa mga adunay lamesa sa merkado inig presyohay na sa ipaihaw nga baboy. Ang na-adunahan og samot mao ang tighimo og feeds, ang middle man ug tag-iya sa lamesa sa merkado. Tan-awa ilang mga balay mao kanay ebidensiya kinsay nagpakadato.

Pila na ka presidente ang miagi hangtod milingkod ang anak ni Cory nga si Pres. Noynoy Aquino? Apan nakabati ba gud kita sa kaharuhay mugna sa ilang gipangsaad?

Ang problema kay ang mga walhon nakaon sa sistema, wala na gyu’y langas kay amigo nila si Noynoy.