EDITORYAL - Ang balaod ni Kiko

Naklaro na g'yud nga gipahimuslan karon ang mga menor de-edad paghimo og illegal nga kalihukan. Dunay balaod nga dili masayon-sayon pagdakop ang mga menor de-edad. Apan ang nakagrabe kay ang ubang batan-on gikuha na nga sakop sa "gun-for-hire."

Nadakpan sa kapolisan ang 17-anyos nga taga Barangay Tejero, dakbayan sa Sugbo. Gironda sa kapolisan ang tagoanan sa ilang grupo ug nasakmit ang daghang armas.

Dugay na nga nakadawat ako og report kabahin sa grupo nga gisalmotan sa mao nga batan-on. Wala usab kini malilong sa mga opisyal sa Tejero ang mao'ng grupo kay ang tagoanan sa ilang lider duol ra man sa gipuy-an sa usa ka opisyal.

Apan ngano nga dugay man nga naronda sa kapolisan ang mao nga tagoanan sa giingong gun-for-hire? Wala ba'y pagpakabana ang mga opisyal sa barangay nga mahunong ang ilang kalihukan? Nahadlok ba sila nga mobadlong o mahadlok panimaslan?

Mao kini ang posible nga mga rason sa ilang pagpakahilom. Apan ang isyu sa paggamit na sa mga menor-de-edad isip sakop sa mga grupo nga nalambigit sa illegal nga kalihukan, unsay nakapadasig kanila?

Ang tubag mao nga gihatagan og proteksyon sa balaod ang mga menor de-edad nga sila dili basta-basta nga madakop ug kun ubos pa sa 15-anyos dili mapasakaan og kaso.

Kini ang hinungdan nga daghang batan-on nga sayon-sayon na lang mohimo og krimen tungod sa balaod nga nahimo pinaagi ni Senador Kiko Pangilinan.