EDITORIAL - Bugti sa Pagtabang

Adunay mga tawo nga kun imong tabangan, moabuso na hinoon ug sila maghatag na og problema sa kagamhanan.

Daghan kaayo ang ehemplo niini. Pipila ka pamilya nga mitukod og kabalayan sa Warwick-Barracks market gipabakwit ug temporaryo nga gipapuyo ilawom sa viaduct sa South Coastal Road nga atbang ra sa Sitio Bato, Barangay Ermita.

Nasunog ang ilang mga balay sa Warwick-Barracks kaniadtong Enero mao nga gibutang usa sila diha sa mayor kay wala pa may ilang kabalhinan.

Apan panahon sa gabii dunay mga bata sa mao nga mga pamilya nga naghatag og kakuyaw sa mga drayber nga sila maligsan kay gihimo nila nga plaza ang karsada.

Ang mga pamilya ‘sab nga gitugotan nga makapuyo diha sa kanhi CitiCenter Commercial Complex sa Barangay Kamagayan miabuso ang uban kanila kay nalambigit og illegal nga kalihukan sama sa prostitusyon ug pagpamaligya’g shabu.

Duna ‘say mga tindera’g imahen nga gitugotan nga maninda sa aseras likud nga bahin sa Basilica Minore del Santo Niño sa dalan D. Jakosalem nga miabuso kay ipaabot gayud nila sa karsada ang ilang tindahan.

May namaligya og imahen nga dili gayud motuman sa mando sa City Hall nga pagamyan nila ang gidak-on sa ilang baligyaanan. 

Kun ingon niana ang inyong batasan nga dili na mopatoo sa mga opisyal nga nagtinguha nga mahapsay ang atong dakbayan, unsa kaha’y dagway sa atong siyudad?