Sala ang pagpatay, sala ang pagpanapaw ug sala ang bisan unsang maghatag og kadaut sa atong isigkaingon. Apan ning maong mga sala adunay sinugdanan ug hinungdan. Ang kasuko pananglitan maoy magtukmod sa tawo nga mopatay. Ang paghingalan og boang o kwanggol ang posibling hinungdan sa panagbangi nga moresulta sa panag-away o dili ba kaha pinatyanay.
Ang maulagong pagtan-aw ngadto sa usa ka maanyag nga dalaga moresulta sa pagpanapaw diha sa hunahuna ug kasingkasing.
Praktikal ang atong Ginoo diha sa iyang pagbatbat ning maong mga hinungdan kun nganong makasala gyud ang tawo. Mao nga husto gyud ang panultihon: PREVENTION IS BETTER THAN CURE. Kini ang hinungdan nga si San Juan Bosco ang mihimo sa PREVENTIVE METHOD aron ang kabatan-onan walay kahigayonan sa paghunahuna sa mga butang nga walay hinungdan. Mas maayo nga imbis atong paaboton nga mosilaob ang kalayo sa kasal-anan atong pagngon o sumpoon ang haling nga iyang sinugdanan.