Nadismaya pag-ayo ang daghang trabahador pagkasayod nila nga ang Regional Tripartite Wages and Productivity Board (RTWPB) wala mohatag og umento sa inadlaw nila nga sweldo.
Gani ang usa sa duha ka representante sa labor sector diha sa RTWPB naglaraw nga moundang na lang sa iyang katungdanan kay gihulagway niya nga walay mga kalooy ngadto sa mga trabahador ang representante sa management ug government sectors.
Trese pesos lang ang gihatag nga Cost of Living Allowance (COLA) ngadto sa mga trabahante nga nagdawat lang og inadlaw nga sweldo nga wala molabaw sa minimum wage nga P367.
Kay ngano, dili ba diay apil nga nasakripisyo sa pagmahal sa presyo sa palaliton ang mga trabahante nga nagsweldo subra sa minimum nga suholan?
Unya nganong ang COLA wala man gipatuman sa mga dapit nga grabe’ng naigo sa bagyo’ng Yolanda?
Daghan ang nakapangutana kun ngano nga sa matag deliberasyon sa RTWPB sa awhag pagpa-usbaw sa sweldo kanunay man nga magkumboya ang management ug government sectors sa pagbasura sa gipangayo?
Ang RTWPB gilangkoban og duha ka representante sa labor sector, duha ‘sab sa management, ug duha sa government, ug maisip nga ikatulo na ang direktor sa Department of Labor and Employment (DOLE).
Natural nga kun magkomboya na’ng daan ang government ug management sectors, pilde na’ng daan ang sektor sa mamumuo.