Ang mga palusot

Daghan karon ang giimbestigahan sa atong kongreso ug ehekutibo. Usa na niini ang palusot sa bugas humay nga giingong gikontrolar sa mga dagkong magpapatigayon. Apan nganong nakasentro man lang sa palusot sa bugas humay ang imbestigasyon nga gihimo sa atong gobyerno nga unta dili man lang ang bugas humay ang gipalusot dinhi sa nasud?

Sigun sa atong nasayran dili lang bugas humay ang gipalusot dinhi sa nasud. Ang mga tigpalusot, nagpalusot usab kini og krudo ug gasolina, mga ceramics, mga sakyanan, drugas ug apil na gani ang mga basura.

Sa mga gipalusot mas maayo gani nga maoy unahon sa pagbukiki sa mga sakop sa kongreso ug ehekutibo ang ginadiling drugas ug basura tungod kay mas dako ug grabe kini og epekto sa mga tawo ug sa nasud kun imong itandi sa bugas humay, gasolina ug krudo.

Ang drugas nga nakasulod o gipalusot dinhi sa nasud makamatay sa tawo ug makadaut sa ugma sa nasud samtang ang basura makadaut sa panglawas sa tawo ug makaguba sa kalikopan. Busa dili lamang unta kini baliwalaon sa gobyerno tungod sa dili maayo niining epekto.

Kun buot huna-hunaon mas maayo pa ang bugas humay nga gipalusot tungod kay dili kini makadaut sa tawo hinuon makatambok ug makatambal kini sa iyang kagutom.Makapabarato man gani hinuon kini sa bugas sa merkado tungod gibaligya kini nga minus ang prisyo kay wala man kini mobayad og buhis sa gobyerno.

Sayod kita nga ang usa sa nakatampo sa ka mahal sa palaliton mao ang buhis nga gibayad sa mga negosyante ngadto sa atong gobyerno. Tungod sa kadaghang buhis nga gipabayran, ang mga magpapatigayon maglikay-likay na sa pagbayad og buhis sa ilang mga inangkat nga produkto didto sa gawas maong ila na lamang kining gipalusot.

Dili man ugod ka madasig sa pagbayad og buhis ngadto sa atong gobyerno tungod sa kadaghan na niini ug labaw sa tanan, tungod sa pagkurakot, pagwaldas ug pagbulsa lang niini niadtong mga naghupot og dagkong katungdanan sa atong kagamhanan.

Kun may hingusgan ang kagamhanan mahitungod sa palusot kinahanglang dili lamang ang bugas humay kun dili i-apil usab unta niini ang mga palusot sa gasolina ug krudo, mga ceramics, ginadiling drugas ug mga basura.

Happy Valentine’s Day diay kaninyong tanan para ugma.