Daghang karsada paingon sa sudlonon nga bahin sa lainlaing kabarangayan, dili lang dinhi sa dakbayan sa Sugbo, kun dili apil na sa ubang mga dapit, nag-anam na g’yud kagagmay.
Mga nagpuyo daplin sa karsada gipasagdan ra sa mga opisyal nga mipalapad sa ilang balay ngadto na sa karsada nga kun adunay sunog maglisud na gani ang mga fire trucks pag-agi.
Ang mga bombero maoy sagad maigo sa diha-diha nga pagbasol gikan sa publiko kun dugay kini nga makapawong sa mga sunog nga moulbo ug mougdaw sa ilang kabalayan.
Dili ba diay angay usab nato nga basolon kining mga tawo nga hakog ra kaayo og pwesto nga apil ang karsada himoong kabahin sa ilang panimalay?
Ang mga opisyal sa kabarangayan nga nagmika lang sa ilang katungdanan ug gipasagdan ang binuang sa ilang mga lumulopyo, dili ba diay sila angay usab nga tulisokon?
Daghang mga opisyal sa lainlaing kahugpongan sa mga lumulopyo wala usab makabadlong sa hinakog nga buhat sa ilang mga sakop.
Bugti sa ilang mga pagpasagad sa katungdanan dili sila magbasol kun mahimong abu ang ilang kabalayan kun adunay sunog kay dili man dayon makasulod ang mga fire trucks.