Ang bugas ug ang illegal nga drugas

Namatikdan na karon ang paghinayhinay  pagkunhod sa presyo sa matag kilo sa bugas sa pagsulod sa unang bulan sa tuig 2014 sukwahi niadtong naghinapos nga mga bulan sa miaging tuig nga hilabihan ang pag-usbaw sa presyo sa matag kilo nga maoy  epekto sa duha ka dagkong katalagman nga 7.2 magnitude nga linog ug bagyong  Yolanda.

Ang hinayhinay  pagkunhod sa presyo sa matag kilo sa bugas namatikdan taliwala usab sa gihimo nga pakisusi sa  matud pa pagpalusot sa sinakong bugas sa pipila ka mga negosyante gikan sa ubang kanasuran paingon dinhi sa nasud.

Ang National Bureau of Investigation (NBI) nga maoy gitahasan sa paghimo og  pakisusi nag-umol na karon og task force nga giapilan sa NBI’s anti-graft division ug mga rehiyonal  niining buhatan  sa Metro Manila.

Sumala pa nga natigayon ang pag-umol og task sa NBI pinaagi usab sa kamandoan ni Justice Secretary Leila de Lima sa tuyo nga masuta ang gitakaho nga rice smuggling activities sa nagkalainlaing pantalan dinhi sa nasud.

Gitataw nila nga kun tinuod man  nga adunay nahitabo  nga pagpayuhot og mga sinakong bugas gikan sa ubang kanasuran paingon dinhi sa nasud  hayan nga nahitabo usab ang pagpalusot sa illegal nga drugas.

Naghimo na og hiningusgang kampanya ang atong mga tinugyanan sa kagamhanan apan bisan pa man niini sa gihapon nagpadayon ang  pagkuyanap niini sa kabarangayan  nga maoy hinungdan nga ang mga adik-adik padayon usab sa ilang paggamit.

Matud pa nila nga kun ang bugas  maoy magnihit maoy maapektohan ang kinabag-ang katawhan sa nasud  dakong sukwahi kun ang shabu maoy  magnihit nga ang maepektohan kadto lamang nagumon sa paggamit  og illegal nga drugas nga mga adik-adik.