Ang hingpit nga pagpasaylo

Nahimo nang panultihon nga ang tawo dili perpekto, nga tungod niani gihimo na lang nga katarungan ang kahuyangon o kamasalaypon sa atong pagkatawo. Ang tinuod baya, sa sinugdanan gibuhat kita sa Dios nga balaan ug perpekto. Ang una tang ginikanan maoy nakaingon niini nga atong napanunod ang kasal-anan. Apan ang Dios gamhanan nagpasaylo kanato. Basta nakaila kita sa atong sala ug mapinasayloon sa isig katawo. Apan unsaon man ang hingpit nga pagpasaylo?

Kitang tanan adunay hiyas sa pagpasaylo. Ang problema lang kay managlahi ang disposasyon diha sa atong pagpasaylo. Sagad gihimo lang nga komplimento o pakaaron-ingnon. Ang uban mora’g dili kapasaylo, apan iyang mga lihok ug sinultihan, ingon sa masabot nga nakapasaylo na. Ang uban, dili nimo matugkad kun tinuod ba nga nakapasaylo. Kun ang mata lay pahukmon, mora’g dili magkatugma ang pagtugkad sa hingpit nga pagpasaylo nato sa isig katawo.

Hinuon adunay mga ideya sa atong mga eksperto, nga sarang nato nga himuong giya aron makahimo kita’g hingpit nga pagpasaylo sa nakasala kanato.

(1) Sagupon ang balaanong pagpasaylo…kun kita way sala… duolon nato ang nakasala. Pasabton sa kinasingkasing ngano siya nakasala. Tabangan ug tudloan nga dili na mausab ang paghimo sa ingon. Hataga’g paglaum nga may higayon pang matul-id ang unsa mang kasaypanan nga nabuhat.

(2) Ihatag ang suporta nga maseguro ang hingpit nga pagpasaylo. Kanunay ipabatyag ang pagmahal aron mapapas kadtong hinungdan sa iyang kalapasan. Malipayon moabag sa unsa may mahimong gikinahanglan nga dili na siya makasala pag-usab, kanus-a pa man nganha kanimo o sa katilingban.

(3) Hikalimti ug ayaw na ugkata ang negatibong mga hinungdan nga mopabalik lang sa kapakyasan ngadto sa atong hingpit nga pagpasaylo. Likaye ang bahad pagbikil pagtipig sa kahimangod diha sa atong galamhan aron ang kalipay maoy hiyas nga mopalungtad sa atong maayong pagkatawo.

(4)Pangayoon sa Kahitas-an nga mahimo kitang modelo sa katarong o kaangayan. Nga magamit sa pagpatunhay o paglig-on sa positibong panan-aw nga dili matarog taliwala sa grabeng mga tentasyon o pagsulay. Sa ingon atong mapahimutang ang katawhan diha sa tiunay nga pasaylo ug pagsinabtanay.