Ang damgo nakahatag og kahingangha o dili ba kaha katingala niadtong nakasinati kanila. Si Hari Nebuchadnezzar ang nikonsulta sa mga mahikero ug mga maalamon sa iyang kapanahonan aron mahatagan og kahulogan ang iyang mga damgo, labina ang damgo nga naghisgot mahitungod sa kahoy.
Si Daniel ang nihatag og hubad sa maong damgo nga naghisgot nga ang kahoy mismo mao simbolo sa hari mismo. Daghan sa mga sikolohista ning maong kapanahonan ang buot modason sa hubad nga gihimo ni Daniel ug dili ba kaha sa hubad nga gihimo ni Jose.
Ang abilidad ni Jose nga mobasa og mga damgo mao ang naghatag kaniya sa dungog ug kadato. Ug nahimo siyang gamhanan ikaduha sa Paraon sa Ehipto.
Ang maong paraon nagdamgo mahitungod sa mga tambok ug payat nga mga baka. Kini gihubad ni Jose ingon nga panahon sa kaabunda ug panahon sa kalisud gumikan sa dakong gutom nga nagsingabot.
Ang pangutana nganong nagdamgo man ang maong hari niadto? Kini tungod kay kabahin kini sa mga kabalaka ug kahadlok ni bisan kinsang tawo niadtong panahona nga mao ang gutom.
Sa waking life nahimo kining kabalaka nga moresulta sa pagtumaw niini diha sa mga damgo ginamit ang mga simbolo nga mohulagway niini.