Ang problemang pinansyal

Adunay hugna sa atong kinabuhi, nga usahay ingon sa maputong kita sa kalalim sa problema mahitungod sa inadlaw nga panginahanglan. Madato man o masapian, pulos apektado niini. Sa mga tawo nga nag-inusara lang sa kinabuhi, mahimong molihok lang segun sa iyang mahimo, kontento na kaayo. Maong ig-abot sa kaminyuon, bation na’g kahadlok, kay sayud siyang sagubangon ang mas komplikadong problema kun unsaon pagsustener ang pinansyal para sa pamilya.

May nahinabi kitang nagsunod sa lindog nato, misaysay sa iyang kaagi, nga unta kahatagan og sulbad o kakuhaan og leksyon sa kinabuhi. Sa iyang lakbit saysay sa iyang kaminyuon, wa siya magdahum nga maingon ani. Sa unang katuigan sa kaminyuon nila, malipayon kaayo. Labi na nga nagbunga na ang ilang pagminahalay.  Gidoble ang paningkamot alang sa ilang pamilya.

Nagkadugay kanunay na mag-away, gumikan lang sa problemang pinansyal. Kulang na, bisa’g may kinitaan ang magtiayon, kutas na nga akatahon ang pinansyal sa nagkadako nilang panginahanglan. Mitumaw ang mga kabalaka sa magtiayon, ingon sa nakunhoran sa pagsalig ang usa’g-usa. Labi na, nasayud si Mrs. nga adunay mga anak gisuportahan sa unang karelasyon si Mr. Napungot si Mr.  ug naghunahuna kini makigbuwag sa iyang Mrs. kay wa na siya kakita’g laing paagi unsay maayo pang buhaton. Wa damhang mahitabo kini sa iyang kinabuhi.

Busa alang niadtong may susama’g situwasyon o kaha sa dili pa musolod sa kaminyoon angay nato nga isilsil sa kaisipan, di kini pagkaon basta lang iluwa kun wa nay lami. Tungod kay di gyud kalikayan, mas daghan pang komplikasyon sa problema ang sagubangon. Isip responsable, ayuhon pagplano ang inyong kinitaan sa trabaho. Ang pagasto himuon lang gayud sa mapuslanong butang. Iplastar o bahigang may prayoridad nga unsa may ikasarang, mao lay paiguon.

Ayaw himoang gawi ang pagpangutang nga igarantiya ang suweldo. Moabot ang panahon nga malumos ka’s utang, permi molabad ang ulo, kay nabuhi na man lang sa utang hangtud mabug-atan kay wa nay katakos sa pagsustener sa maayong pagdumala sa pinansyal.

Magsikaysikay og laing kapanguwartahan, aron mapun-an ang kita mo, iyawat makasapar ug makatigum alang sa umaabot. Magsinabtanay sa pagpaniid sa mga oportunidad nga anaa nagpahipi sa palibot. Kakugi, pailob ug kaabtik mao ray buhaton alang sa pinansyal nga kagawasan.