PUJ nga bati

Giawhag ni Mayor Mike Rama ang mga negosyante nga mohimo sila og air-condition nga mga pansayan diha sa daplin sa mga karsada.

Aw natural, dunay bayad kining maong mga pansayan alang niadtong mogamit. Mitumaw ang huna-huna ni Rama tungod kay atul sa miaging Sinulog Grand Parade, daghan kaayo nga nangreklamo.

Samtang ang dakbayan sa Sugbo adunay ordinansa nga mosilot sa mga tawo nga masakpan nga magpataka og pangihi o molabay sa ilang mga hugaw diha sa publiko nga mga dapit, apan walay mga pansayan.

Nindot ‘sab kining sugyot sa mayor apan kinahanglan nga aprobahan pa kini sa konseho sa dakbayan aron nga masiguro nga dili usab mahal alang sa mga mogamit.

Aw, hinuon kun ilang mahalon wala ‘say mogamit sa pansayan og alkanse ang hingtungdan nga magpapatigayon nga nagtukod. Ang sugyot sa mayor mao nga ang pansayan mahimong balhin-balhinon sa lainlaing dapit.

Ikaw bai, maam, unsay imong huna-huna kabahin niini? Pastilan ‘sab bitaw kadtong mga konsehal nga moaprobar sa ordinansa nga mosilot sa masakpang magpataka og pangihi, wala g’yud nila huna-hunaa ang kabahin sa publiko.

Kun moingon sila nga gisumiter man og public hearing ang mao nga ordinansa, pila ra man gud kabuok ang mga tawo nga masayod nga adunay gipanday nga balaudnon kabahin ana?

Sa laktud, kadto ra’ng ilang giimbitar nga pasultihon atul sa public hearing. Nganong nataligam-an man nila sa paghuna-huna nga samtang ilang silotan ang masakpang magpataka og pangihi, apan asa man ang pansayan?

Bisan ako may mga higayon nga mohunong ko sa mga mingaw nga dapit daplin sa karsada aron pagtuman sa sugo sa lawas. Mao kini ang ordinansa nga gipakatulog ra sa mga polis kay apil ang mga polis nga wala motuman niini.

Motoo ka ba konsehal?

* * *

Kinsa kaha sa mga konsehal dinhi sa dakbayan ang makahuna-huna paghimo’g kausaban aron mahatagan og komportable nga pagsakay ang mga yano nga sumasakay og PUJ?

Dunay mga PUJ sa pagka karon nga pwerte g’yung muboa sa atup. Masungko ka kun mosakay. Usa niini mao kining PUJ nga nagbiyahe sa Minglanilla nga ang Plate Numbers GWW-578.

Misuway ko pagsakay niining mao nga PUJ, pastilan, nanaug ko kay ang puthaw nga gunitanan sa dapit sa atup mapantok sa atong ulo kun dili ka magbantay tungod sa kamubo.

Dunay usa ka tiguwang nga akong gipangutana kun unsay iyang reaksyon, utro pa siya nga wala makagusto sa desinyo sa maong sakyanan.

Dili kay kini ra maoy PUJ nga mubo og atup, daghan kini sila. Maayo unta kun may konsehal nga mohimo’g ordinansa nga dili na kini itugot dinhi sa dakbayan sa Sugbo.