Daghang magpiyesta sa Senyor Santo Niño

Ang pagsaulog sa tuig nga pangilin ni Senyor Santo Niño sa matag bulan sa Enero maisip lamang nga usa sa labing dako nga kasaulogan sa iyang kapistahan nga gihugopan sa minilyon  nga mga deboto, mga turista ug dumoduong nga maoy hinungdan nga makabaig.

Matud pa nila nga  ang maong pangilin ni Senyor Santo Niño sa dakbayan sa Sugbo sa matag tuig maisip lamang nga kabahin sa labing dakong kasaulogan sa iyang pangilin sanglit daghan pa man sa mga dapit sama sa sitio o barangay nga nagsaulog sa ilang piyesta nga ang Senyor Santo Niño gihapon ang ilang gipistahan. Sa dakbayan sa Sugbo nga maoy nagsaulog sa tinuig nga pangilin dili usab ikahilin nga ang dakong posibilidad nga gawas sa dakbayan sa Sugbo nga may mga barangay pa o sitio nga magsaulog usab og piyesta sa ilang kapilya ug si Senyor Santo Niño  gihapon ang ilang gipasidunggan.

Bisan pa sa mga sikbit nga mga dapit nga dakbayan sa Sugbo  sa higayon nga mahuman na ang pagsaulog sa tinuig nga pangilin ni Senyor Santo Niño  mao usab ang ilang pagsaulog sa piyesta sa ilang kapilya nga magpasiugda gihapon og sinulog sa pagyukbo sa Balaang Bata nga Senyor Santo Niño.

Ang dakbayan sa Mandaue ug dakbayan sa Lapu-Lapu maoy kabahin lamang sa daghan pa nga mga dapit gawas sa dakbayan sa Sugbo  nga may  magsaulog usab  og piyesta sa ilang kapilya nga diin ang Senyor Santo Niño gihapon ang ilang gipasidunggan.

Naglakip na niini ang baranggay Paknaan sa dakbayan sa Mandaue nga kaniadto human sa tinuig nga pangilin sa dakbayan sa Sugbo  ang mga molupyo sa maong dapit magsaulog usab sa ilang piyesta  ug mag-indigay pa og Sinulog nga karong panahona isip pagpalain maoy gihimo ni Paknaan Barangay Kapitan Malaquias Soco ang pag-usab og pangalan ngadto na sa Silhig Festival apan ang Balaang Bata mao gihapon ang ilang gipasidunggan.

Ang sitio Anakma sa barangay Pagsabungan sa dakbayan sa Mandaue sa ilang kapilya magsaulog usab sila og piyesta ug si Senyor Santo Niño gihapon ilang gipasidunggan ug magpasiugda usab sila og indigay sa Sinulog pinaagi sa pagpangulo sa magtiayong Raul ug Dolores Ruiz.

Sa  sitio Abuno sa barangay Pajac, dakbayan sa Lapu-Lapu nga magsaulog usab sila sa ilang kapilya diin si Senyor Santo Niño gihapon ang ilang gipasidunggan ug kaniadto sa piyesta nga ilang gipahigaon sa miaging katuigan may  indigay usab sa Sinulog ang maong dapit  isip pagpasidungog kang Senyor Santo Niño.

Kini matigayon pinaagi sa pagpasiugda usab ni Mrs. Lily Igot  nga lumad nga molupyo sa maong dapit nga bisan kun nagbase na sa nasud sa Amerika apan mopauli lamang sa matag tuig nga  pangilin alang sa pagpasiugda og Sinulog.