Si Obispo Broderick Pabillo sa Manila nagkanayon nga ang nagkataas nga kaso sa internet pornography mabasol sa suporta sa gobyerno sa Reproductive Health (RH) law nga bag-ohay lang napasar ning administrasyon ni Noynoy Aquino.
Sumala pa ni Pabillo nga dili molampos ang kampanya sa gobyerno batok sa pornograpiya sa internet kun sa samang bahin aktibo niining gikampanya ang pagpang-apod-apod og mga kontraseptibo sama sa pills ug condom.
Diha sa internet anaa na ang daghang binuang nga naggamit sa kababayen-an ilabi na ang kabataan nga biktima sa pornograpiya.
Kasagaran sa mga nalambigit niini mga langyaw nga manganhi dinhi sa Sugbo aron pagpa-posing ug pag-shooting og mga bastos ug law-ay nga mga salida.
Samtang aktibo ang kapolisan ug ubang ahensiya sa kagamhanan pagsugpo ning maong krimen nga naglambigit sa kababayen-an ug kabataan, nagkataas gihapon ang kaso sa pornograpiya sa nasud tungod kay sayon man lang maabli ang mga website nga nagtanyag og bastos ug law-ay nga mga butang.
Busa dili kaayo haum ang pagsaway ni Pabillo sa gobyerno pinaagi sa pag-ingon nga dili molampos ang kampanya niini batok pornograpiya kun ang gobyerno nagsuporta sa RH law.
Alang nako, ang RH law ug ang pornograpiya sa internet managlahi nga isyu nga kun sulayan og sumpot seguro nga malawgaw.
Dili ko moingon nga panglawgaw kining kang Pabillo tungod kay isip Pastor sa mga kalag, trabaho niya ang pagpahinumdom nga ang RH law sama sa internet pornography, law-ay nga buhat ug supak sa kasugoan sa Diyos.
Akong usbon, bisan magtuwadtuwad pa og sumpo ang gobyerno batok sa mga Pilipino ug mga langyaw nga anhi manguha og hulagway sa mga hubo ug binastos nga posing sa mga babaye ug mga bata, ug bisan hutdon pa ang mga kriminal nga nalambigit niini dinhi sa nasud, ang pornograpiya sa laing mga nasud libre gihapon nga mabuksan sa mga Pilipino.
Bisan undangon ang RH law, dili mohunong kanang mga website nga binuhat sa mga langyaw sa laing mga nasud nga nagtanyag og pornograpiya.
Ang populasyon sa Pilipinas nagkataas. Ning tuiga, moabot na kita og 100 milyones, sumala sa pagtuon.
Samtang nagkadaghan kita, nagkamubo usab ang mga oportunidad sa mga tawo mao nga daghan ang mga pordoy.
Wala’y konkreto nga programa ang kaparian alang sa mga kabus. Sa mga simbahan nga akong nahibaw-an, wala gyud ko makakita og linya sa mga tawo nga hatagan og bugas sa mga pari. Sa laktod, wala’y matabang ang kaparian sa mga kabus nga nagkamang sa kalisod.
Kaniadto, bokal kaayo ko nga nagdepensa sa simbahan sa baruganan niini batok sa RH law.
Apan kaniadto pa usab ko nangutana unsay matanyag sa simbahang Romano Katoliko sa gipangitang sulbad sa kalisod, pagsulbad sa nagkataas nga populasyon sa nasud, sa nagkagamay nga oportunidad ug sa nagkataas nga gidaghanon sa mga krimen mugna sa kalisod sa panahon.
Makasabot hinuon kita nga trabaho sa simbahan ang pagtisok og moralidad sa katawhan.
Apan maayong sabton sa simbahan nga trabaho sa gobyerno ang pagpangita og sulbad sa mga problema sa komunidad.