Ang si bisan kinsa adunay katungod nga makabiyahe ug aduna sab siya’y katungod nga ma-isyuhan og passport. Apan kining maong katungod aduna say limitasyon ilabi na kun aduna kay nahimong kalapasan sa Republic Act (R.A.) No. 8239 or the Philippine Passport Act of 1996. Kinahanglan sab kang motuman sa mga rekisitos aron ka ma-isyuhan og passport. Apan unsa bay mga dokumento nga gikinahanglan kun usa ka minor de edad ang mokuha og passport? Kana nga pangutana ang atong tubagon karon dinhi sa atong column.
Dear Atty. Divine;
Aduna lang unta koy ipangutana labot sa akong pag-umangkon nga 10 anyos nga plano sa iyang mama nga paadtuon sa Australia karong summer aron magkauban sila. Ang problema kay wa pay passport ang akong pag-umangkon, ang akong pangutana attorney kun mamahimo bang ako ang mokuha og passport alang sa akong pag-umangkon kay ang iyang mama tua man sa Australia. Unsa may angayan nakong dad-on kun ako mokuha sa iyang passport? Mamahimo ba ang akong pag-umangkon nga makabiyahe sa Australia bisan kun way kuyog kay ang plano sa akong igsuon nga sugaton lang siya ngadto sa Airport sa Australia? Unsa may mga dokumento nga angayang dad-on sa akong pag-umangkon sa iya unyang pagbiyahe? Hinaut nga imong matubag ning akong pangutana. Daghang Salamat. — Leny
Dear Leny,
Tungod kay minor de edad ang imong pag-umangkon, as a general rule, ang iyang mama gyud unta ang mokuha kaniya og passport apan tungod kay wa ngari ang iyang mama mamahimo nga ikaw ang molukat og passport sa imong pag-umangkon apan kinahanglan nga magdala ka og Affidavit of Support and Consent with Special Power of Attorney nga pinirmahan sa imong igsuon. Kinahanglan nga notarized ang maong Affidavit ug adto kini niya panotaryuhan sa embahada sa Pilipinas didto sa Australia. Human sa pagnotaryo niini, iyang ipadala nganha kanimo ang maong dokumento. Gawas sa maong Affidavit magkinahanglan sab ka sa photo copy sa passport sa imong igsuon lakip na sa likod nga bahin sa passport nga anaa ang iyang pirma. Laing dokumento nga imong dad-on sa pagkuha og passport sa imong pag-umangkon mao ang iyang NSO issued Birth Certificate, in case dili maklaro ang entry sa iyang NSO mas maayong magdala ka na lang sab sa iyang birth certificate nga gikan sa Local Civil Registrar. Pagdala sab sa imong government issued ID kay ila man nang pangitaon sa Department of Foreign Affairs sa DFA. Inig adto nimo sa DFA kinahanglan nga kuyog nimo ang imong pag-umangkon kay kinahanglan man na og personal appearance sa mo-apply sa passport ug ang DFA na mokuha kaniya og picture. Kun molarga ang imong pag-umangkon karong summer padung sa Australia mamahimo man bisan kun wa siya’y kuyog apan kinahanglan nga mangayo ka daan ug Permit to Travel gikan sa DSWD ug dad-on kini niya sa iyang pagbiyahe. Way prolema kun mobiyahe ang minor nga way kuyog kay ang flight stewardees mismo maoy mo-assist kaniya. Hinaut nga akong natubag ang imong mga pangutana. Daghang Salamat ug Pit Senyor!— Atty. Divine
* * *
Kun kamo adunay pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag adlaw’ng Miyerkules ug Domingo.