Senyor sa Santo Niño gihugopan sa mga deboto

Gihugopan sa mga deboto ni Senyor Santo Niño sa dakbayan sa Mandaue ang pagbisita sa iyang imahen kagahapon sa buntag nga alas 6 pa ang takna sa buntag nga nag-atang sa dalan  Lopez Jaena sa barangay Subangdako hangtod na sa dalan A. del Rosario sa barangay Tipolo ug barangay Guizo hangtod sa dalan Sotero Cabahug sa barangay Centro diin usab nagpaabot sa National Shrine of Saint Joseph.

Ang imahen ni Senyor Santo Niño nga gipasakay sa karo maoy nagsunod sa karo sa Birhen sa Guadalupe nga gihugyawan sa hilabihan nga kahinangop sa mga naglinya nga mga deboto sa maong dalan sa dakbayan sa Mandaue nga ang pipila kanila nagdala sa  iyang imahen ug   ang  pipila ka mga deboto  nagpalupad usab og mga balloon.

Nagsunod ang karo sa Birhen sa Guadalupe sa speed  cop nga maoy nag-una sa motorkada nga maoy nagpa-iway sa mga deboto sa pagpadaplin nga gusto gyod nga mokab-ot sa paghikap sa karo nga giluwanan sa duha ka imahen. Nahunong sa pagdagan ang mga pribado ug pasaheroan nga mga sakyanan nga nagsubay sa dalan M.C. Briones nga nagpaingon sa dakbayan sa Sugbo nga ang mga drayber igo na lamang sa pagpaabot nga moliko na ang karo sa duha ka balaang imahen ngadto sa dalan A. del Rosario.

Si Rico Larebas, 34 anyos, minyo nga taga Paknaan, dakbayan sa Mandaue   nga pasahero sa PUJ miingon nga ang wala paghimo og rerouting sa mga sakyanan sa tinugyanan sa trapiko sa maong dakbayan maoy hinungdan nga naghuot na hinuon ang kadalanan kay nahinayak man ang mga drayber sa pag-agi sa maong lugar.

Si Retired Senior Inspector Raul Noynay, imbestigador sa Traffic Enforcement Agency of Mandaue (TEAM) nga nahinabi niining tagsulat miingon nga wala sila mohimo og rerouting sa mga sakyanan nga moagi sa dalan sa dakbayan tungod kay mohimo lamang sila sa pagtak-op sa higayon nga mahidangat na ang imahen ug mosubay na kini sa mga dalan sa pagpadayugdog paingon sa National Shrine of Saint Joseph sa barangay Centro. Gipasabot ni Noynay nga ilang ablihan ang maong dalan ug mahibalik na ang normal nga dagan sa mga sakyanan human usab sa paglabay sa karo sa imahen ni Senyor Santo Niño ug Birhen sa Guadalupe ug hingpit na kini nga napahimutang sa sulod sa simbahan.

Si Floriza Corbeta, 50 anyos, minyo, nga taga Ormoc City  nga nagdala  usab sa gamay nga imahen ni Senyor Santo Niño nakasayaw sa hilabihan kahinangop dihang milabay na ang karo nga giluwanan niini sa barangay Tipolo nga giatangan niini sayo pa sa kaadlawon.

Wala niya baliha ang pag-uwan-uwan kay alang kaniya ang pag-agi sa imahen ni Senyor Santo Niño sa iyang nahimutangan nga nag-uwan maoy timailhan nga nagdala kini og dili masukod nga panalangin.