Daghan nang mga higayon nga ang killer o hitman nagsul-ob og uniporme sa pulis. Wa man lay gibuhat ang kapolisan mahitungod ini. Aron ang uniporme sa pulis, pulis ra gyud tinuod ang makasul-ob. Aron unta dili mahanaw ang pagsalig sa katawhan mahitungod sa tawong nag-unipormi og pulis, kinahanglan makaseguro gyud ang tawo, nga ang nagsul-ob og unipormi sa pulis, pulis gyud tinuod. Segurado man nga sakitan ang pulis tinuod o mainsultohan, kun ang ordinaryong tawo moingon “Pulis ka tinuod, sarge? Patan-awa ko sa imong ID. O unsay kamatuoran nga pulis ka tinuod?†Basin hinuon nga hipusilan lang ang mangutana.
Pero, duna ko’y pipila ka ubos nga mga sugyot aron mahigpitan ang paggamit sa uniporme sa pulis, aron pulis lang gyud tinuod ang makagamit niini. Una, magpapasar og balaud mahitungod niini. Apan aron malikayan ang dakong gastohan sa gobiyerno, kay ang pagpanday og balaud, gasto man gyud ang labing taas nga opisina sa Kapolisan, maghimo lang og polisiya. Pinaagi sa memorandum circular sa tanang opisina sa kapolisan sa tibuok nasud.
Mao kini ang akong nahunahunaan:
1. Imbentaryohon ang uniporme sa kada pulis nga tinuod. Obligasyon sa kada pulis nga ampingan ang iyang uniporme. Dili niya pahulaman kang bisan kinsa. Dunay silot kun mawad-an siya’g uniporme nga way balido nga hinungdan.
2. Kinahanglan dunay opisyal nga mananahi sa uniporme sa pulis.
3. Ang dili opisyal nga mananahi, dili puwede motahi og uniporme sa pulis.
4. Ang mga maghimo og drama, pelikula o salida diin dunay karakter nga maggamit og uniporme sa pulis, kinahanglan duna say imbentaryo sa mga uniporme sa pulis. Ug wala’y laing opisina nga may katungod pagtinir og uniporme sa pulis, opisina sa pulis ra gyud.
5. Ang maghimo’g pasundayag diin may pulis mag-uniporme, mangayo og permit sa pulis ug anha manghulam og uniporme sa opisina sa pulis.
6. Ang tawo nga dili pulis unya maghupot og uniporme sa pulis, dunay silot nga priso o multa, sa illegal nga paghupot sa uniporme sa pulis,
7. Ang pulis nga magpahulam sa iyang uniporme sa laing tawo, duna gihapo’y silot;
8. Ang mananahi nga manahi og uniporme sa pulis nga way permit, dunay silot;
9. Illegal na ang pagpamaligya og uniporme sa pulis. Dunay silot.
Kining tanan, yano lang panghunahuna sa usa ka concerned citizen. Kay sakit hunahunaon nga kun makakita ta’g tawong nag-unipormi og pulis, mora’g maluag atong dughan nga wa diay tay dilikado sa mga kriminal. Unya pag-ando pa, mao ra man diay mopatay nato ang mga uniporme og pulis.