Unsaon mahimong malipayon

May panultihon nga lisod buhaton ang usa ka butang kun kini dili pa nimo nakat-onan, apan kun batid ka na niini labaw pa sa kasayon ang mahimo mo. Mao na nga usahay haskang lisora ingon sa idlas kaayo angkunon ang kalipay sa kinabuhi. Nga ang uban hilabihan na ang kasagmuyo nga nawad-an sa paglaum. Ang  wa nila mahibaloi, ang tiunay nga kalipay, mahimo mo lang kini maangkon kun duna kay hugtanon nga pagsalig ug taas nga kompiyansa sa kaugalingon mo.

Unsaon ba kini nato nga makuha o maangkon? Mas maayo himoa kining giya;

(1) Dayega ang kaugalingon mo – dili man kinahanglan nga imo pang isinggit sa kalibutan nga maayong laki ka aron tahuron. Panagsa ato lang ikibo ang abaga nato, sa pagpahinumdom sa kaugalingon, nga aduna usab kita’y nahimo sa kinabuhi. Nga kini piho makapataas sa kompyansa.

(2) Pangitaa ang nindot mong hiyas – Kinahanglan sultihan ang kaugalingon nga dili ka basta nga tawo. Kay aduna kay talento, kaalam ug abilidad. Kinahanglan sab nga mapahalipayan ang kaugalingon mo, sa paagi nga maghimo bisa’g gamay basta nga kini butanga dunay matampong kapuslanan.

(3) Dawata ang kaugalingon – Unsa may anaa nimo angay nga ipagpasalamat. Ug angay mo usab dawaton nga aduna pay mas nakalabaw nimo, nga dili angay kasinahan. Labaw nga dili ka makaminus sa tawong gitan-aw mong ubos ra nimo.

(4) Magkat-on kanunay – Way tawo nga hingpit sa kahibalo. Mas maayo nga kun kulang pa ang atong nakat-onan, padayon sa pagtuon sa mga bag-ong butang. Kun kini makita sa mga tawo nga miumento ang imong mentalidad, segurado mobilib ug modayeg sila kanimo. May sukaranan na ang katakos mo nga ikaw malipay.

(5) Positibo kanunay – Kinahanglan di lang positibo ka sa hunahuna. Ubanan mo kini sa buhat, aron kun unsa man ang mga butang nga himuon, mahimong masayon na alang kanimo, nga ang mga pagdayeg mag-ambahan sa pasidungog.

(6) Dayegon ang Dios – Kinasingkasing tumanon ang kabubut-on sa Dios. Kay siya ang maghatag sa tinubdan sa kalipay nga atong angkunon. Di nimo kini matagamtaman kun ato lang ibalewa ang giya nga mao ang katarungan sa Dios.