Mga talagsaong buta

Sama sa atong nakita sa kadalanan, komon na kaayo nga ang mga buta nagpalimos nga may kuyog aron giyahan sa padulngan. May nakita pud tang buta nga mora’g nakakita kay mosakay man og sakyanan, mora’g suhito asa mopaingon. Naa poy buta nga nag-inusara lang naglakaw sa kaaserasan o sa kadalanan nga mora’g way gikabalak-an basin masaag. Gani duna pay buta nga maestro, writer, manager, singer, typist ug uban pa. Apan may mga talagsaong abilidad sa buta nga maglisod pa gani kadtong tawong makakita pa, sama ini;

Pintor nga buta – nawad-an sa paglaum si John Bramlitt nga nag-antos sa grabeng depresyon human siya mabuta tungod sa komplikasyon sa epilepsy niadtong 2001, sa edad nga 30 anyos. Hangtud iyang naamgohan nga may abilidad siya sa pagpintal pinaagi sa paghinol, maila niya ang mga kolor. Gitun-an niya pag-ayo ang pagsagol sa kolor pinaagi sa paghikap lang. Ang puti baga ug ang itom humokon. Ang mga pinintal niya naila na sa ubang kanasoran. Daghan siya’g nahimo nga nahalin na sa 20 ka nasod. Nakadawat og rekognisyon gikan sa youtube isip Most Inspirational Video sa 2008 ug 3 ka Presidential Service Award, gumikan sa iyang talagsaong pagkat-on sa arte sa pagpintal.

Buta nga surfer– Buta na nga gipanganak si Derek Rabelo. Duna siya’y congenital glaucoma apan wala ni niya himoang babag para makahimo siya’g usa ka butang nga makapahingangha–ug usa na ini ang pag-surfing. Busa 3 anyos pa nagsugod na siya sa pagtuon ini. Matud niya nga way imposible kun motuo ka sa Dios. Makahimo ka sa butang bisa’g may kakulian. Di katuhoan ang pag-surfing ni Rabelo nga usa ka buta nga hayon lang misungasong nga nagpautaw-utaw sa mabangis nga lawod, sama sa gihimo sa ubang normal nga tawo.

Buta nga runner–Si Marla Runyan nabuta sa edad nga 9 anyos, tungod sa sakit niyang Stargardt’s Disease. Bisan sa iyang kahimtang nga buta, wa siya mawad-i’g paglaum kun di mas milig-on pa ang iyang pagkatawo. Iyang gipakita nga bisa’g buta makahimo siya sama sa mahimo sa usa ka normal nga tawo. Iya ni napama-tud-an, dihang nahimo siyang unang butang tsampiyon sa Paralympic o lumba sa dagan. Niadtong 2001, napatik ang sinulat niya nga naghubit sa iyang kinabuhi, ang libro nga nag-ulohan..No Finish Line: As I See It.