Gitan-aw nako ang disinyo sa building nga gisugyot nga tukoron alang sa bag-ong Cebu City Medical Center (CCMC). Walay problema, nindot ang mao nga building nga hingpit nga mobarug kun gastohan og dul-an sa usa ka bilyon ka pesos.
Ang pagbalhin sa Panganiban Street nga mora’g iliwag ug adto na magsubay sa dapit nga nahimutangan karon sa CCMC building ug molusot sa Natalio Bacalso Avenue, maoy tan-aw nako makapalangan sa proyekto.
Ang pagdemolis kon pagguba sa CCMC building nga matud pa nakasinati og daghang mga liki tungod sa linog niadtong Oktubre 15 mogasto kini og milyon-milyon ka pesos. Kadto gani nga karaang Ramos Supermarket nga duha ra ka andana migasto ang City Hall niadto og P16 milyones sa pagpaguba.
Tan-aw nako mas labaw na nga mogasto og daku nga kantidad ang CCMC building kay upat man kini ka andana. Sa ato pa, manginahanglan na usab og kwarta sa pagpaguba pa lang sa CCMC building.
Ang paghimo sa karsada, diha sa dapit nga nahimutangan sa CCMC building lain na usab nga gastohan kay ang pagsemento niini daku man gihapon og gasto... milyon-milyon ka pesos na ‘sab.
Apan labaw na nga daku ang gasto sa dul-an sa usa ka BILYON ka pesos nga pagpatukod sa building alang sa bag-ong ospital. Wala pa’y kwarta ang dakbayan sa Sugbo nga gastohon niining mao nga proyekto.
Kini man gani ang rason nga padayon ang dakbayan sa Sugbo nga nagpakilimos sa mga tawo, milusad og “peso-peso fund drive†aron makatigum og kwarta nga ikadugang sa pagpatukod og ospital.
Apan bisan pa og dunay pipila ka dakbayan, mga lungsod ug adunahang politiko nga mihatag og dagko nga kantidad sa donasyon, gamay pa gihapon ang natigum. Wala pa makaabot og P10 ka milyon.
Ang nakadaku niini ang gihatag man sa SM Prime Holdings nga P5 milyones para sa mga biktima sa linog sa dakbayan, ang P500,000 gikan sa Davao City, usa laing P500,000 gikan sa Parañaque City.
Ang Ormoc City mihatag usab og P300,000 ug may lain pa nga lungsod sa Leyte. Ambot og kanus-a pa kaha kita makaangkon og bag-ong ospital. Tan-aw nako kutob pa lang kini sa design.
Lahi ang pagsugod kay sa paghuman. Ang pagsugod sa project mahimo man nga first phase haligi ra, ang isyu kun kanus-a mahuman nga kapahimuslan na g’yud. Sa ingon kadaku nga kantidad maglisud pa ang dakbayan gawas lang kun hikawan usab sa budget ang ubang departamento.
Kun ako ang mayor, putlon usa nako ang paghatag og dugang honoraryom sa mga huwes, fiskal ug ubang mga kawani nga dagku na og sweldo aron magamit pagdugang sa budget alang sa ospital.